Ձեր վստահելի աղբյուրը

ՀՀ կառավարության այսօրվա նիստում վարչապետ Կարեն Կարապետյանն անդրադարձավ արտահանվող և ներմուծվող սննդամթերքի փորձաքննության կարգին:

Վարչապետի խոսքով՝ սննդամթերքի անվտանգության ոլորտում իրականացվող վարչարարության շահառուների ստվար զանգվածը գործարար միջավայրի ներկայացուցիչներն են: Այս տեսանկյունից, ըստ վարչապետի, անհրաժեշտ է, որպեսզի արտահանվող կամ ներմուծվող ապրանքների թույլտվության տրամադրումը, փորձաքննության ենթարկվող պահանջներն ու կարգը լինեն հստակ և կանխատեսելի:

«Ներկայումս կառավարության մի շարք որոշումներով՝ սննդամթերքի փորձաքննության անցկացման կարգերում դեռևս ամբողջությամբ չեն տեղայնացվել միջազգային նորմերը: Արդյունքում, գործարարների մոտ  օբյեկտիվորեն կարող է առաջանալ տարընկալում, մասնավորապես, սննդամթերքի ներմուծման և արտահանման վարչարարության դեպքերով»,- Կարեն Կարապետյանը:

Ելնելով վերոնշյալից՝ վարչապետը հանձնարարեց Սննդի անվտանգության պետական ծառայության պետին, Տնտեսական զարգացման և ներդրումների նախարարին մինչև տարվա վերջ համատեղ մշակել և  Կառավարության աշխատակազմ ներկայացնել սննդամթերքի արտահանման և ներմուծման դեպքերում պահանջվող փաստաթղթերի փորձաքննության կարգի հստակեցման, միջազգային նորմերի տեղայնացման, կառավարության մի շարք որոշումներում փոփոխություններ կատարելու վերաբերյալ առաջարկություններ:

«Հատկապես, որ վերջին շրջանում մամուլում տեղ են գտել հավի մսի ներմուծման որոշակի խնդիրներ»,- ընդգծեց վարչապետը: