Ձեր վստահելի աղբյուրը

Տնտեսագետ Ատոմ Մարգարյանը չի բացառում, որ մինչև տարեվերջ գնաճը կշարունակվի, սակայն կարծում է, որ այն չի գերազանցի կառավարության նախանշած գնաճի առավելագույն շեմը։

Panorama.am-ի թղթակցի հետ զրույցում անդրադառնալով վերջին շրջանում սպառողական շուկայում արձանագրված գնաճին՝ տնտեսագետը նշեց, որ 10 ամսվա տվյալներով արձանագրվել է 1,2 %-ի գնաճ, իսկ մինչև տարեվերջ, եթե հաշվի առնենք, որ ներմուծող-վաճառողները բարձրացնում են ապրանքների գները, ապա, ըստ նրա, կարելի է ակնկալել, որ գնաճը կտեղավորվի  2017 թվականի բյուջեով նախատեսված 4 տոկոսի սահմաններում:

Ըստ տնտեսագետի՝ այսօր Հայաստանում որոշ սննդամթերքներ, մասնավորապես, կարագն ու մսամթերքը թանկացել են շուրջ 50 տոկոսով, ինչը պայմանավորված է նաև ներկրվող ապրանքների թանկացմամբ։ «Բայց կարող ենք ասել, որ այս պահի դրությամբ մենք գնաճային լուրջ ճնշումներ չունենք»,- հավելեց նա:

Ինչ վերաբերում է հունվարից սպավող գնաճին, Ատոմ Մարգարյանը հիշեցրեց, որ 2018 թվականի հունվարից գործողության մեջ է դրվում Եվրասիական տնտեսական միության Մաքսային օրենսգիրքը, իսկ դա նշանակում է, որ մինչև 2022 թվականը որոշակի ապրանքների գներ կբարձրանան: «Իհարկե կլինի նաև գնանկում, բայց խոսքը փոքր խումբ ապրանքատեսակների մասին է: Ընդհանուր առմամբ. թանկացումներ կլինեն ակցիզային հարկի գծով, մասնավորապես, ալկոհոլային խմիչքների, ծխախոտի, բենզինի, դիզվառելիքի գները կաճեն, բայց կարծում եմ, որ 2018թ-ին այդքան մեծ գնաճային թռիչքներ չեն լինի, կլինի 1.5-2 տոկոս հավելյալ գնաճ»,- ընդգծեց Ատոմ Մարգարյանը:

Անդրադառնալով առաջին անհրաժեշտության ապրանքների՝ մասնավորապես հացամթերքի  արտադրության ծավալների նվազմանը, տնտեսագետն ասաց, որ դրա վրա հնարավոր է իր ազդեցությունը թողնում է արտագաղթը: «Նաև չի բացառվում, որ մարդիկ սահմանափակել են հացի սպառումը, ինչը տրամաբանական չէ, բայց սա է իրականությունը»,- նշեց նա: