Ձեր վստահելի աղբյուրը

Խորհրդարանում այսօր քննարկման ներկայացվեց  «Ծառուկյան» խմբակցության պատգամավորներ Միքայել Մելքումյանի, Նաիրա Զոհրաբյանի և Վարդևան Գրիգորյանի կողմից հեղինակած «Կազմակերպությունների և անհատ ձեռնարկատերերի կողմից ներմուծվող՝ ակցիզային հարկով հարկման ոչ ենթակա այն ապրանքների ցանկը հաստատելու մասին, որոնց ներմուծումն ազատված է ավելացված արժեքի հարկից» ՀՀ օրենքում լրացումներ կատարելու մասին օրենքի նախագիծն առաջին ընթերցմամբ ընդունելու հարցը։

«Կառավարության կողմից  ներկայացված նույն նախագիծը ընդունվել է երկրորդ ընթերցմամբ և ամբողջությամբ՝ համաձայն որի  ընդունվել է ԱԱՀ կողմից բոլոր տեսակի մեքենաների, սարքավորումների, բացառությամբ կենցաղային նշանակության և հումքային ապրանքների ներմուծումը՝ 2018 հունվարի 1-ից ազատվում է ԱԱՀ-ից: Օրենքում նշված հումքի տեսակների շարքում, սակայն բացակայում է դաշտային սպատը, կրաքար, տոլոմիտ և կիր պարունակող այլ քարերը, որոնք հանդիսանում են կարևոր հումքատեսակներ ապակու արտադրության ոլորտում»,- իր ելույթում նշեց հիմնական զեկուցող Վարդևան Գրիգորյանը։

Պատգամավորը հայտարարեց, որ իրենց կողմից ներկայացված օրենքի նախագծով առաջարկում է այդ հումքատեսակները ներառել վերոնշյալ ցանկում, ինչը դրական եզրակացություն է ստացել հանձնաժողովում և կառավարության կողմից:

Հարակից զեկուցող պատգամավոր Սերգեյ Բագրատյանը նշեց, որ հանձնաժողովը բազմակողմանի քննարկման արդյունքում տվել է դրական եզրակացություն։

«Հանձնաժողովում առաջին քննարկման ժամանակ  տարակարծություններ կային, բայց բանավեճի արդյունքում կարողացանք հասնել այն եզրույթին, որ օրենքի միատեսակ կիրառումն արդարացված է»,- ասաց պատգամավորը։