Ձեր վստահելի աղբյուրը

Խորհրդարանն այսօր քննարկում է ՀՀ դատական օրենսգրքում փոփոխություններ և լրացում կատարելու մասին և ՀՀ վարչական դատավարության օրենսգրքում փոփոխություն կատարելու մասին օրենքների նախագծերի փաթեթը երկրորդ ընթերցմամբ և ամբողջությամբ ընդունելու հարցը։

Հիմնական զեկուցող ՀՀ արդարադատության նախարարի առաջին տեղակալ Արթուր Հովհաննիսյանը հիշեցրեց, որ այս նախագծերի փաթեթն ուղղված է բեռնաթափելու Վարչական դատարանի ծանրաբեռնվածությունը։

«Մասնավորապես՝ վարչական վերաքննիչ դատարանում լրակազմ ավելացնելու միջոցով, այսինքն Վարչական վերաքննիչ դատարանում երեք դատավորի հաստիք է ավելանում։ Բացի այդ՝ որոշակի փոփոխություններ են կատարվել օրենքներում, որոնցով փորձ է արվում վարչական դատարանի ծանրաբեռնվածությունը նվազեցնել այն գործերով, որոնց ժամանակ վարչական մարմնի ընդունած ակտի վերաբերյալ հասցեատերը չի առարկում և այդ ակտի իրավաչափության հարց չի բարձրացնում»,- մանրամասնեց փոխնախարարը։

Մտքերի փոխանակության ժամանակ «Ելք» խմբակցության պատգամավոր Արտակ Զեյնալյանը նշեց, որ չափազանց կարևոր է դատավորների քանակը յուրաքանչյուր 100 հազար բնակչի հաշվարկով։

«Եթե դրա քանակը պակաս է լինում, ապա տուժում են արդար դատաքննության մի շարք բաղադրատարրեր, օրինակ՝ ողջամիտ ժամկետում գործի քննության իրավունքի բաղադրատարրը։ Անկախ նրանից՝ անձը շահել, թե պարտվել է, եթե արդարադատությունն  ուշացված է, այն համարվում է մերժված արդարադատություն։ Մենք Վերաքննիչ դատարանի դատավորների քանակը պետք է ավելացնենք, շատ կարևոր է մեկ կազմով ավելացնելը, սակայն մենք դա ավելացնում ենք առաջին ատյանի դատարանի դատավորների հաշվին, և ըստ էության խնդիրը չենք լուծում։ Որպես բեռնաթափման մեխանիզմ առաջարկում ենք գրավոր ընթացակարգ, որն իրենից ենթադրում է, որ անձինք պետք է ծանուցված լինեն դատական նիստի օրվա և ժամի մասին, դատավորը պետք է նիստը բացի, գրավոր ձևով հայտարարի այդ ողջ ընթացակարգը»,- հայտարարեց պատգամավորը։

Նրա կարծիքով՝ ընդամենը հարկավոր էր տարեկան 64 մլն դրամ, որպեսզի չպակասեցնեին Առաջին ատյանի  դատարանի դատավորների քանակը և ավելացնեին Վերաքննիչ դատարանի դատավորների քանակը. «Մենք չկարողացանք բյուջեում գտնել այդ գումարը, որպեսզի կարողանայինք  ապահովել կարևորագույն իրավունքի այս էլեմենտը, մենք խնդիր ենք ունենալու՝ ոլորտին այսպես վերաբերելու համար»։

«Ծառուկյան» խմբակցության պատգամավոր Գևորգ Պետրոսյանն էլ ասաց, թե բազմիցս հնչել է այն իրավացի տեսակետը, որ արդար դատաքննության իրավունքի կարևոր բաղադրիչը գործերի ողջամիտ ժամկետում քննությունն է, իսկ այսօր դա ՀՀ-ում խնդիր է։

«Լինում են աշխատանքային վեճերի վերաբերյալ դատավարություններ, որ տևում են երկու, անգամ երեք տարի, ինչը ոչ մի կողմին ձեռնտու չէ։ Մենք իսկապես ունենք դատական համակարգում դատավորների ավելացման կարիք։ Պետք է իրավական հռչակված պետությունը միջոցներ ունենա և ձեռնարկի, որպեսզի բյուջեն հոգ տանի այս ուղղությամբ։

Չեմ կարծում, որ աստղաբաշխական գումարներ են պետք մի քանի դատավորով դատական համակարգը համալրելու համար»,- եզրափակեց պատգամավորը։