Կառավարության առաջարկած նոր մոդելով՝ համայնքներն ինքնուրույն են ֆինանսական միջոցներ հայթայթելու
Կառավարության ներկայացրած նոր հայեցակարգ-մոտեցումը համայնքների զարգացումը կապում է նոր մոդելի հետ, որը ենթադրում է ներքևից վերև շարժ: Դեկտեմբերի 9-ին Դիլիջանում լրագրողների հետ զրույցում այս մասին նշեց Կենտրոնական բանկի Դիլիջանի ուսումնահետազոտական կենտրոնի ղեկավար Մարտին Գալստյանը: Նրա խոսքով՝ նախկինում համայնքները սահմանափակված էին իրենց տրվող եկամուտներով, և այդ պայմաններում շատ բաներ չէին կարողանում իրականացնել: Նոր մոտեցման համաձայն՝ համայնքները ստանձնում են ավելի մեծ պատասխանատվություն, և ներքևից վերև շարժման միջոցով աճի ներուժը չի սահմանափակվում:
«Մենք Կենտրոնական բանկի կողմից ներկայացնելու ենք ֆինանսական նոր գործիքներ ու նոր մոտեցումների հնարավորություններ, որոնք թույլ կտան կառավարությանը, մեր համայնքային ղեկավարներին ու համայնքներին ընդհանրապես այդ խնդիրներն ավելի արդյունավետ իրականացնել: Նոր ֆինանսական գործիքները, որ առաջարկում ենք մեր գործընկերներին՝ ներառել իրենց զինանոցում, թույլ են տալու առաջանցիկ աճի տեմպեր ապահովել»,- ասաց նա:
Ըստ Գալստյանի՝ դա ենթադրում է համատեղ ֆոնդերի ձևավորում, ֆինանսական այնպիսի գործիքներ, որոնց դեպքում համայնքը ևս պարտավորություններ է ստանձնում, մասնավորի և պետականի համադրման միջոցով ձևավորել ֆոնդեր, որոնք թույլ կտան ավելի մեծ միջոցներ ներգրավել համայնքի զարգացման նպատակով: Գալստյանը նշեց, որ Կենտրոնական բանկն ունի մեծ փորձ այդ միջավայրում ու առաջարկում է իր հնարավորությունների շրջանակում օժանդակել համայնքներին:
«Ներքևից վերև մոտեցումը նշանակում է, որ համայնքն ունակ է լինելու առաջարկել մրցունակ ծրագրեր, որոնք մասնավորի կողմից կդիտարկվեն որպես հնարավորություն: Մասնավորը համայնք կմտնի նրանց հետ համատեղ այդ ծրագիրն իրականացնելու համար: Խոսքը արտոնությունների մասին չէ, այլ փիլիսոփայության փոփոխության»,- ասաց նա:
Գալստյանը նշեց, որ նախկինում մեխանիզմն աշխատում էր հետևյալ կերպ՝ ֆինանսական միջոցները տրվում էին համայնքին, այդ գումարի շրջանակում համայնքը ծախսերն էր անում, այժմ արդեն համայնքն է առաջ գալու նախաձեռնություններով, հայթայթելու է ֆինանսական միջոցներ, ուստի այդ նախագծերը պիտի մրցունակ լինեն, որ ներդրողը հետաքրքրված լինի ներդրումներ կատարելու հարցում:
«Մասնավորը գալիս է այնպիսի տեղեր, որտեղ կա գրավչություն, իսկ դրա առաջին տարրը համայնքի ներգրավվածության մակարդակն է: Մոտեցման փոփոխությունը ինքնըստինքյան բերելու նրան, որ համայնքը շատ ավելի մեծ ներգրավվածություն է ունենալու գործընթացներում»,- նշեց նա:
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
