Ձեր վստահելի աղբյուրը

«Ներկայում այդ բարեփոխումների արդյունքում ձևավորվել է 52 խոշորացված համայնք՝ 465 բնակավայրով»,- ՀՀ համայնքների խորհրդաժողովում հայտարարել է տարածքային կառավարման նախարարի տեղեկալ Վաչե Տերտերյանը:

Նրա խոսքով, առաջիկա տարիներին նախատեսվում է խոշորացնել ևս 450 համայնք. «Խոշորացված համայնքներում ներդրվում են քաղաքացիների սպասարկման գրասենյակներ՝ Համայնքային կառավարման տեղեկատվական համակարգով, ինչն էականորեն բարձրացնում է համայնքային ծառայությունների մատուցման հասանելիությունն ու մատչելիությունը»:

Փոխնախարարի համոզմամբ, այս բարեփոխումների արդյունքում դրական ազդեցությունը համայնքային կյանքի վրա ակնառու է, մասնվորապես, ընդլայնվել և բարելավվել են համայնքային ծառայությունները, բարձվացվել է կառավարման արդյունավետությունն ու հանրային մասնակցությունը, ապահովվել է կառավարման թափանցիկությունը, ավելացվել ֆինանսական ռեսուրսները։

«Հայաստանի տարածքային զարգացման հիմնադրամի աջակցությամբ արդեն իսկ մի շարք խոշորացված համայնքներում ծրագրեր են իրականացվում ենթակառուցվածքների զարգացման, տեխնիկական վերազինման, էներգախնայողության ծրագրերի իրականացման ուղղությամբ»,-ամփոփել է փոխնախարար Տերտերյանը։

ՏԿԶ նախարարության հասարակայնության հետ կապերի վարչության փոխանցմամբ,  խորհրդաժողովին մասնակցում են տարածքային կառավարման և զարգացման նախարար Դավիթ Լոքյանը, ՀՀ մարզպետների, համայնքապետեր, շահագրգիռ կազմակերպություններ:

Հայաստանի տարածքային զարգացման հիմնադրամի նախագահ Աշոտ Կիրակոսյանը խորհրդաժողովի մասնակիցներին ներկայացրել է հիմնադրամի միջոցով իրականացվող ծրագրերի ընթացքը։ Նրա խոսքով, դրանք իրականացվում են ըստ ժամանակացույցի, և որոշ համայնքների ծրագրեր արդեն մտել են իրականացման փուլ։

Խոսելով համայնքների տնտեսական զարգացման մեխանիզմների մասին` ՀՀ ՏԿԶ փոխնախարար Վարազդատ Կարապետյանը ներկայացրել է այս ոլորտում նախատեսվող բարեփոխումները, դրանց պոտենցիալ հնարավորությունները, անդրադարձել է հաջողված օրինակներին։

«Յուրաքանչյուր համայնք պետք է ունենա համայնքային տնտեսական զարգացման պատասխանատու, ով ծրագրեր պետք է ներկայացնի մարզի զարգացման հիմնադրամներ, որը նախատեսվում է ստեղծել 2018-ին»,- նշել է փոխնախարար Կարապետյանը։