Ձեր վստահելի աղբյուրը

Հայաստանում օրենսդրական փոփոխությունների խնդիր կա՝ մարդու իրավունքների պաշտպանությունն ավելի բարձր մակարդակի հասցնելու համար: Դեկտեմբերի 11-ին լրագրողների հետ հանդիպմանը «Ընդդեմ իրավական կամայականության» ՀԿ-ի տնօրեն, ՀՀ առաջին օմբուդսմեն Լարիսա Ալավերդյանը խոսեց օրենսդրության ոլորտում թերացումներից:

«Սկսենք այդ ընտանեկան բռնության նախագծից: Մենք ողջունում ենք նման օրենքները, սակայն ափսոսում ենք, որ հասցրել ենք մի վիճակի, երբ մեր ավանդական «վերաբերմունքը» բավարար չէ, որ կանխարգելվեն ընտանեկան բռնությունները: Բավական է ասել, որ մահվան դեպքեր կան, իսկ ավանդական ընտանիքի, հասարակության համար դա պետք է այնպիսի ճչացող փաստ լինի, որ անգամ քննարկումներ չլինեին»,- ասաց նա: Ալավերդյանն ընդգծեց՝ քննարկումներ պետք է լինեին միայն մի ուղով՝ հստակեցնել առկա ձևակերպումները և այն, թե՝ արդյո՞ք պետք են ենթաօրենսդրական ակտեր՝ դրա հետ կապված:

Ըստ Ալավերդյանի՝ օրենսդրական փոփոխությունների խնդիր կա, այդ թվում՝ դաժան վերաբերմունքի մասով: Իրավակիրառ պրակտիկայի և օրենսդրական գործունեության վերաբերյալ նա ընդգծեց՝ այն փոքր հաջողությունները, որ իրենք միշտ էլ նշում են, այդ թվում՝ գլխավոր դատախազության վերաբերյալ, բավարար չեն՝ ասելու համար, որ դրական միտում է արձանագրվել, դրանք ընդամենը դրական դեպքեր են: «Երբ հասարակությունը չի զգում, երբ մենք չենք զգում, որ որակական փոփոխություններ կան, գնդակը գտնվում է իշխանության դաշտում: Դեռ բավական գործ կա անելու»,- ասաց նա:

«Ընդդեմ իրավական կամայականության» ՀԿ-ի փաստաբան Արա Ղարագյոզյանը նշեց, որ նախորդ երկու տարիներին աննախադեպ և բացահայտ բռնություններ կիրառվեցին լրագրողների նկատմամբ, երբ հատուկ մի տեղում հավաքեցին լրագրողներին՝ բռնության ենթարկելու համար: Փաստաբանը նշեց, որ չի կարծում՝ մի երկու դեպք բացահայտելով, մի երկու պաշտոնյայի պատասխանատվության ենթարկելով՝ առաջընթաց ենք արձանագրում մարդու իրավունքների տեսանկյունից: Ղարագյոզյանի խոսքով՝ չկան անկախ դատարաններ, դատավորներից շատերն անկախ չեն, նայում են՝ իրենց ինչ են ասելու՝ ինչ որոշում պիտի կայացնեն:

Փաստաբանը հույս հայտնեց, որ մի օր Հայաստանում դատարաններն իսկապես անկախ կլինեն:

«Ընդդեմ իրավական կամայականության» ՀԿ-ի Երևանյան գրասենյակի տնօրեն Շողինե Սողոմոնյանը թվային տվյալներ ներկայացրեց: Նա նշեց, որ 2017 թ. ընթացքում այս կամ այն ոլորտում իրենց իրավունքների պաշտպանության համար դիմում է ստացվել 382 շահառուից: 45 քաղաքացու նկատմամբ միջադեպ է գրանցվել ոստիկանությունում. ՀԿ փաստաբանները հասել են, տեղում իրավախորհրդատվություն տրամադրել, կան 35 դատակլան գործեր, որոնք ներկայացնում են ՀԿ փաստաբանները:

Սողոմոնյանը նշեց, որ իրենց իրավունքների ոտնահարման համար ՀԿ-ին են դիմել անազատության մեջ գտնվող 65 քաղաքացիներ: Հասարակական կազմակերպությունը հոգեբանական աջակցություն է տրամադրել, սոցաշխատողն իրականացրել է սոցիալական աջակցության որոշակի քայլեր, շահառուների զգալի մասը ԴԱՀԿ հետ խնդիր է ունեցել, մասնավորապես՝ դեպք, երբ թոշակառուին երկու ամիս զրկել են թոշակից, այն է՝ սառեցում են դրել հաշվի վրա՝ փաստացի այդ իրավունքը չունենալով, այս կերպ նրանք քաղաքացուն զրկել են գոյատևման միջոցից:

Հասարակական կազմակերպությունն ունի ՄԻԵԴ ներկայացրած 7 գործ: