Ձեր վստահելի աղբյուրը

Եթե տասը տարի առաջ ՀՀ իշխանությունները փորձում էին Համաշխարհային բանկի հետ աղքատության հաղթահարման ծրագիր իրականացնել, ապա այսօր կարծես համակերպվում են փաստի հետ, որ աղքատությունը կենսակերպի անքակտելի մաս է կազմում: Այսօր տեղի ունեցած մամուլի ասուլիսի ժամանակ այս մասին ասաց Արցախի հնագիտական արշավախմբի ղեկավար Համլետ Պետրոսյանը:

Անդրադառնալով ԱԺ հանրապետական խմբակցության պատգամավորներ Հակոբ Հակոբյանի և Խոսրով Հարությունյանի՝ թանկացումների և աղքատ խավի մասին վերջին հայտնի դատողությունների՝ բանախոսը նկատեց՝ նրանց փիլիսոփայությունը նույնական է:

«Խոսքն այն մասին է, որ մենք ունենք աղքատության մշակույթ, ունենք աղքատներ, որոնք առանձնանում և տարբերվում են հասարակությունից: Սա շատ վատ է, կարծես հիշեցնում է միջնադարը, երբ աղքատությունը կենսընթաց էր»,- նշեց բանախոսը:

Համլետ Պետրոսյանի խոսքով, մարտադաշտի է վերածվում նաև մշակութային ժառանգությունը. մենք մեկ հաղթում, մեկ պարտվում ենք Ադրբեջանին:

«Երբ ՅՈՒՆԵՍԿՕ-ն այս կամ այն մշակութային ժառանգությունը ճանաչում է հայկական, մենք ցնծում և դա ներկայացնում ենք որպես մեր հաղթանակ: Նույն կերպ վարվում են նաև ադրբեջանցիները: Մինչդեռ մշակութային ժառանգությունը «Սմերչ» չի, որ դրանով հակառակորդին սպանենք: Մենք այսպես հասնում ենք շատ վատ սահմանագծի: Հայերին սազական չէ կրկեսի դերասան դառնալ: Մեր մշակութային ժառանգությունը պետք է հանենք այդ ծաղրալի մրցակցության ճանապարհից»,- նկատեց բանախոսը:

Անդրադառնալով Դադիվանքի պեղումներին՝ Համլետ Պետրոսյանը տեղեկացրեց, որ այնտեղ այս տարվա օգոստոսի վերջին շատ ընդարձակ պեղումներ են կատարել, հարավային պատի տակ խրամատի նմանությամբ 6 մ երկարությամբ տեղանք է հայտնաբերվել: Սակայն որևէ գտածո այնտեղ չի հայտնաբերվել: Փոխարենը մամուլում անհարկի լուրեր են տարածվել, որ այնտեղ զմռսված ինչ-որ բան է հայտնաբերվել: Նույնիսկ ոստիկանությունից են զանգահարել պեղող արշավախմբի անդամներին՝ հարցնելով գանձերի որոնման անհրաժեշտության մասին: 

«Իրականում խրամատը 13-րդ դարի կառույց է, հավանաբար ծառայել է ջրահեռացման նպատակների»,- ամփոփեց Համլետ Պետրոսյանը: