Ձեր վստահելի աղբյուրը

Ուսանողական խորհուրդներին պետք է մասնակցության իրավունք տրվի նպաստների տրամադրման հարցին: Դեկտեմբերի 13-ին ԵՊՀ-ում ՀՀ ԿԳ նախարար Լևոն Մկրտչյանի հետ հանդիպմանը՝ «Բարձրագույն կրթության մասին» օրենքի նախագծի քննարկման ժամանակ, նման տեսակետ հայտնեց ԵՊՀ ուսխորհրդի նախագահ Արմեն Խաչիկյանը: Վերջինս նախարարից հետաքրքրվեց՝ արդյո՞ք ԵՊՀ հատուկ կարգավիճակը որևէ կերպ տեղ է գտնելու նոր օրենքում:

Խաչիկյանը հորդորեց «ուսխորհուրդ» և «ուսանողական ինքնակառավարում» հասկացություններն օրենքում հստակ սահմանել, քանի որ մինչ օրս նման սահմանում չկա: Նրան նաև հետաքրքրում էր կառավարման մարմիններում ուսանողների մասնակցության ձևաչափի փոփոխությունը, այն, որ թեպետ նոր համակարգը համարվում է ուսանողակենտրոն, սակայն ուսանողների մասնակցության տոկոսը 25-ից իջեցվում է 10 տոկոս: Խաչիկյանին հետաքրքրում էր նաև ֆինանսական միջոցների հարցը: Ըստ օրենքի նախագծի՝ նախատեսվում է բուհերի ուսանողական մարմինների դերի հստակեցում, օրենքում դրանց դերի ամրագրում և բուհի կողմից տրամադրվող ֆինանսավորման ֆիքսված չափի սահմանում՝ 0.2 տոկոս: ԵՊՀ ուսխորհրդի նախագահն առաջարկեց այդ տոկոսը բարձրացնել մինչև 0.5 %:

ՀՀ ԿԳ նախարար Լրոն Մկրտչյանը նշեց, որ փորձելով համալսարանական կառավարման մարմինները հավասարակշռել՝ փորձել են ադմինիստրատիվ որոշ բացթողումներ լրացնել: Նա ընդգծեց՝ բուհերի ֆինանսական միջոցների 80 տոկոսը վարձավճարների վրա է հիմնված, մինչդեռ աշխարհում վարձավճարները կազմում են բուհի ֆինանսական միջոցների 40 տոկոսը:

Նրա խոսքով՝ բուհի բյուջեն պիտի դիվերսիֆիկացված լինի, իսկ այն ստեղծելու համար պետք է բուհական խորհրդին վերադարձնել իր հիմնական առաքելությունը, այն պիտի զբաղվի բյուջե բերելով, հավասարակշռելով: Նախարարը նշեց՝ եթե բուհական խորհուրդները ճիշտ աշխատեին, բուհերն այսօր կունենային անձեռնմխելի բյուջե. ճիշտ չէ համալսարանը թողնել վարձավճարների հույսին, իսկ բուհերի գիտական խորհուրդը ակադեմիական խնդիրներով է զբաղվելու:

Լևոն Մկրտչյանը ուսանողներին հայտնեց՝ եթե կան կոնկրետ առաջարկներ, կարող են ներկայացնել, սակայն նաև մոդել պետք է նշեն: Նրա խոսքով՝ 25 տոկոսի արդյունքն ու ազդեցությունը համալսարանի կառավարման համակարգի վրա պետք է դիտարկել: Նա նշեց, որ պատրաստ է քննարկումների, տեղեկացրեց, որ օրենքն այժմ քննարկումների փուլում է: ԵՊՀ հատուկ կարգավիճակն, ըստ նախարարի, ֆիքսված է Մայր օրենքում: Նախարարը նաև տեղեկացրեց, որ զեղչային համակարգն այսօր խճճված է, այդ ուղղությամբ էլ պետք է հստակեցումներ լինեն, սահմանվեն խմբեր, կատեգորիաներ, նրանց ինչ-որ զեղչային աստիճան տալ, իսկ մնացած դեպքերում զեղչեր լինեն հիմնադրամների, համալսարանների նախաձեռնությամբ: