Ձեր վստահելի աղբյուրը

Քննարկումների արդյունքում ԱՄԿ փորձագետների գրեթե բոլոր առաջարկություններն ընդունվել և իրացվել են նախագծում, բացառությամբ ԱՄԿ այն առաջարկության, որ անհրաժեշտ է վերացնել օրական 24, շաբաթական 48 ժամ աշխատաժամանակի ռեժիմը: 

Աշխատանքի և սոցիալական հարցերի նախարարության հասարակայնության հետ կապերի բաժնից մանրամասնում են, որ դեկտեմբերի 11-13-ը եռօրյա այցով Հայաստանում էին Աշխատանքի միջազգային կազմակերպության կենտրոնական գրասենյակի և Արևելյան Եվրոպայի ու Կենտրոնական Ասիայի երկրները համակարգող գրասենյակի ներկայացուցիչները՝ «Հայաստանի Հանրապետության աշխատանքային օրենսգրքում փոփոխություններ և լրացումներ կատարելու մասին» ՀՀ օրենքի նախագծի վերաբերյալ ԱՄԿ գրասենյակի առաջարկությունները քննարկելու նպատակով:

Այցելության շրջանակներում մասնագիտական քննարկումներ են եղել ՀՀ աշխատանքի և սոցիալական հարցերի նախարարությունում: Այնուհետև կազմակերպվել է առավել լայն քննարկում, որին մասնակցել են ԱՄԿ փորձագետները, շահագրգիռ պետական մարմինների, ինչպես նաև գործատուների և աշխատողների շահերը ներկայացնող կազմակերպությունների ներկայացուցիչները:

Այցելության վերջին օրը կազմակերպվել է ամփոփիչ քննարկում, որին մասնակցել են Հանրապետական եռակողմ հանձնաժողովում պետական կողմը ներկայացնող մարմինների, ինչպես նաև Հայաստանի գործատուների հանրապետական միության, Հայաստանի արհմիությունների կոնֆեդերացիայի ներկայացուցիչներ, պատգամավորներ:

Ըստ աղբյուրի, ամփոփիչ քննարկման ընթացքում ԱՄԿ փորձագետները իրենց գոհունակությունն են հայտնել եռակողմ ձևաչափով կազմակերպված քննարկումների և ստացված արդյունքների վերաբերյալ:  Միաժամանակ, ԱՄԿ փորձագետների հետ ձեռք է բերվել պայմանավորվածություն նախագծի ընթացքի հետագա փուլերում անհրաժեշտ համագործակցության վերաբերյալ: