Ձեր վստահելի աղբյուրը

Հայ-թուրքական արձանագրությունների իրողությունն այն է, որ Թուրքիան հրաժարվեց իրականացնել նախատեսվող գործընթացները, ավելին որևէ ցանկություն չի հայտնում վերակենդանացնել արձանագրությունները: Այս համատեքստում ՀՀ նախագահի և արտգործնախարարի վերջին հայտարարությունները՝ հաջորդ գարունը դիմավորել առանց այդ փաստաթղթերի, արտացոլում են առկա իրողությունը: Այսօր կայացած մամուլի ասուլիսի ժամանակ այս մասին ասաց թուրքագետ Ռուբեն Սաֆրաստյանը:

Բանախոսի համոզմամբ, հայ-թուրքական արձանագրությունները մեռած փաստաթուղթ են, գոյություն ունեն միայն ձևականորեն, և Հայաստանը ստիպված է մինչև հաջորդ գարուն դրանք չեղյալ հայտարարել:

«Թուրքիան Հայաստանի հետ հարաբերություններում իր վրա շատ մեծ բան է վերցրել՝ նախպապայմաններ է թելադրում, ճնշումներ բանեցնում, փորձում է միջամտել Արցախյան հարցին: Թուրքիան, ըստ էության, հարաբերությունների կարգավորման գործընթացը փակել է: Այդ երկրի արտաքին քաղաքականությունը հանգեցրել է նրան, որ Թուրքիայի հեղինակությունը զգալի թուլացել է: Էրդողանն անկանխատեսելի է, և Թուրքիան այդ  անկանխատեսելիության պատճառով մեկուսացել է»,- համոզմունք հայտնեց Ռուբեն Սաֆրաստյանը:

Անդրադառնալով իսլամական աշխարհին Թուրքիայի նախագահ Էրդողանի կոչին՝ Երուսաղեմը ճանաչել Պաղեստինի մայրաքաղաք՝ Ռուբեն Սաֆրաստյանը նկատեց, որ սա ընդամենը սեփական հեղինակությունը բարձրացնելու փորձ է, որը դժվար թե հաջողությամբ պսակվի: Դիտարկումը թուրքագետը բացատրեց հանգամանքով, որ արաբական աշխարհն իրականում այնքան էլ դրական չի վերաբերում Թուրքիային: Բացի այդ, իսլամական աշխարհը լրջորեն պառակտված է, չի վարվում համաիսլամական միասնական քաղաքականություն: