Ձեր վստահելի աղբյուրը

Սիրիայից ռուսական զորքերի դուրսբերումը նշանակում է, որ Ռուսաստանն ըստ էության լուծել է իր առջև դրված ռազմավարական խնդիրները: Ռազմավարական խնդիրները լուծված են այն առումով,  որ ԻՊ-ը պարտվեց, նաև հնարավոր եղավ պահպանել և ամրապնդել Սիրիայի նախագահ Ասադի դիրքերը:

Աշխարհաքաղաքական առումով Ռուսաստանն ազդարարեց, որ փորձում է վերադառնալ Մերձավոր Արևելքում ԽՍՀՄ ժամանակների հզոր դիրքերին: Այսօր կայացած մամուլի ասուլիսի ժամանակ նման տեսակետ հայտնեց թուրքագետ, ԳԱԱ արևելագիտության ինստիտուտի տնօրեն Ռուբեն Սաֆրաստյանը՝ միաժամանակ հավելելով, որ ներկայիս Ռուսաստանը չունի այն հեղինակությունը, ինչ ԽՍՀՄ-ը, սակայն ներկայիս գործընթացները լավ հնարավորություն են ստեղծում արաբական աշխարհում վերականգնել և ուժեղացնել իր դիրքերը:

«Զուտ ռազմական տեսանկյունից Ռուսաստանը ցույց տվեց, որ տիրապետում է երկրի սահմաններից դուրս ռազմական բնույթի խնդիրներ լուծող զինված ուժերի: Միաժամանակ, երկու տարի տևած գործողությունները մեծ օգուտ էին ՌԴ-ի համար, քանի որ նա փորձ ձեռք բերեց սեփական ԶՈՒ-ն կիրառել իրական պատերազմական վիճակներում»,- նկատեց բանախոսը:

Թուրքագետի խոսքով, Սիրիայի իրադարձություններում սկսում է երկրորդ՝ դիվանագիտական պայքարի փուլը: Սակայն, հարց է՝ արդյոք հնարավոր կլինի հասնել սիրիական հարցի արդարացի կարգավորմանը, թե կլինեն գործոններ, որոնք կվիժեցնեն բանակցային գործընթացը։ Մասնավորապես, խոչընդոտող հանգամանք, ըստ Ռուբեն Սաֆրաստյանի, կարող է դառնալ Թուրքիայի՝ Սիրիայում իր զինուժը ավելացնելու հանգամանքը:

Անդրադառնալով սիրիահայ համայնքի ապագա ճակատագրին՝ բանախոսը դժվարացավ ասել՝ արդյոք այն ձեռք կբերի նախկին հզոր ուժը:

«Պատերազմի ընթացքում, որքան էլ շատ հայեր հեռացան Սիրիայից, ամեն դեպքում համայնքն իր կորիզը պահպանեց: Չեմ կարծում, որ սիրիահայերի թվաքանակը վերականգնվի, սակայն դրական միտումը զգալի է, համայնքը կարծես սկսում է շնչել»,- ասաց նա: