Ձեր վստահելի աղբյուրը

Հայաստանի նախագահ Սերժ Սարգսյանն «Արմենիա» հեռուստաընկերությանը տված հարցազրույցում իրատեսական է գնահատել 2040 թվականին Հայաստանի բնակչությունը 4 միլիոն դարձնելու իր ներկայացրած ռազմավարությունը:

«Դա մեզ համար նորմալ զարգանալու թիվն է, ես համարում  եմ  իրատեսական է։ Կոնկրետ գործողությունների ծրագիր չկա,  թե ամեն տարի մենք ինչ պետք է անենք, որովհետև, ելույթից հետո ստեղծվել է աշխատանքային խումբ և այդ աշխատանքային  խումբը դրանով է զբաղված։ Կարծում եմ՝ մեր առաջիկա խնդիրն է այս 5 տարիների ընթացքում  միգրացիան  հասցնել, այսպես ասած զրոյական մակարդակի, որպեսզի գնացողների-եկողների տարբերությունը դրական լինի Հայաստանի համար, կամ գոնե  զրոյական»։

Նախագահը նշել է, որ անհրաժեշտ է պայմաններ ստեղծել ներգաղթի համար։

«Մի կողմից, իհարկե, շատ լուրջ ուշադրություն դարձնելով առողջապահական խնդիրներին, շատ լուրջ ուշադրություն  դարձնելով ընտանիքներին, նրանց ամրապնդմանը, սոցիալական վիճակին, երիտասարդների զբաղվածությանը և այլն, մենք պետք է կարողանանք այս ժամանակահատվածում հնարավորություններ ստեղծել ներգաղթի համար։  Ես սա շատ իրատեսական եմ համարում, որովհետև շատ-շատ մարդիկ, ովքեր արտագաղթել են Հայաստանից  չեն գտել այն, ինչ փնտրում էին։ Եվ այդ մարդկանց կարելի է վերադարձնել»,-ընդգծել է նախագահը։