Զինծառայության մասին ՀՀ նոր օրենքը հզոր հենասյուն է. եվրոպացի պաշտոնյա

Քաղաքական 11:27 15/12/2017 Հայաստան

Զինծառայության մասին ՀՀ նոր օրենքը հզոր հենասյուն է. եվրոպացի պաշտոնյա

Զինված ուժերի ժողովրդավարական վերահսկողության Ժնևի կենտրոնի (DCAF) ղեկավարի տեղակալ Ֆիլիպ Ֆլուրին Հայաստանին համարում է կենտրոնի լավ բարեկամը: Այս մասին նա հայտարարեց «Զինված ուժերի նկատմամբ խորհրդարանական վերահսկողություն» խորագրով ՀՀ Ազգային ժողովում տեղի ունեած միջազգային սեմինարի ժամանակ:

Նա կարևորեց պաշտպանության ոլորտում քաղաքացիական վերահսկողությունը, որը ենթադրում է նաև խորհրդարանական բաղադրիչ:

«Խորհրդարանական վերահսկողության գործում անխոս անհրաժեշտ են սահմանադրական դրույթներ և մեխանիզմներ: Խորհրդարանական վերահսկողությունը համագործակցային գործընթաց է, որը բավական նման է սիմֆոնիկ նվագախմբին: Ճիշտ հնչողության համար բազմաթիվ գործիքներ են անհրաժեշտ: Մենք պետք է խորհրդարանին լիազորություններ տանք, որպեսզի այն կարողանա վերահսկողության որոշակի աստիճան ապահովել: Խորհրդարանին պետք է օժտել հետաքննական մեխանիզմներով, ապահովել հատուկ աշխատակազմով, ներդրումներ կատարել պատգամավորների շրջանակում, որպեսզի նրանք ի վիճակի լինեն վերահսկողական գործառույթներ յուրացնել և իրականացնել»,- նշեց Ֆիլիպ Ֆլուրին:

Զինված ուժերի ժողովրդավարական վերահսկողության Ժնևի կենտրոնի ղեկավարը շեշտեց, որ զինծառայության մասին ՀՀ նոր օրենքը շատ լավ հենասյուն է, որի վրա վստահորեն կարող է հենվել խորհրդարանը:

Եվրոպացի պաշտոնյան ընդգծեց, որ զինված ուժերի նկատմամբ խորհրդարանական վերահսկողության գործում եռամիասնություն է անհրաժեշտ՝ ունակություն, հավակնություն և լիազորություն: Բաղադրիչներից գոնե մեկի բացակայությունը թույլ չի տա անհրաժեշտ որակի վերահսկողություն սահմանել:

Վերջում Ֆիլիպ Ֆլուրին ափսոսանք հայտնեց, որ ԵԱՀԿ-ն Երևանում այլևս գրասենյակ չունի:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: