Ձեր վստահելի աղբյուրը

«Հայաստանի բասկետբոլի ֆեդերացիայի տարին հաջող էր, մեծ ծավալի աշխատանքներ կատարվեցին»,- այսօր լրագրողների հետ հանդիպմանն ասաց Հայաստանի բասկետբոլի ֆեդերացիայի փոխնախագահ Արա Պողոսյանը։

Նրա խոսքով՝ օբյեկտիվ և սուբյեկտիվ դժվարությունները շատ են, բայց շարժվում են առաջ. «Շատ գոհ ենք հենց այդ պրոցեսից, որ շարժ կա, հետաքրքրություն կա և բասկետբոլիստների, և երկրպագուների կողմից։ Այսօր խնդիրներ ունենք մրցավարության հետ կապված, այդ խնդիրները փորձում ենք շտկել՝ եվրոպացի մասնագետների մասնակցությամբ սեմինարներ անցկացնելով։ Նաև սուր մարզչական պրոբլեմ ունենք, մարզիչների պակաս կա»։

Ընդգծեց նաև նյութատեխնիկակական բազայի հետ կապված խնդիրները. «Շիրակում թիմեր ունենք, որ պարապմունքներ են անցկացնում շատ վատ պայմաններում, սա մեր ցավն է, որը պետք է լուծենք՝ հովանավորներ գտնելով»։

Հանդիպմանը ներկա Բասկետբոլի ազգային հավաքականի, «Ուրարտու» տղամարդկանց բասկետբոլային ակումբի բասկետբոլիստ Էդգար Բաբայանի կարծիքով ևս, բասկետբոլն այսօր Հայաստանում զարգանում է. «Հետաքրքրությունն է շատ մեծացել այս մարզաձևի նկատմամբ, բայց սրա հետ միաժամանկ խնդիրներն էլ շատ են»։

Նա ևս առանձնացրեց Արթիկի մարզադահլիճի վատ վիճակը:

«Կածում եմ, եթե ամեն թիմ ունենա իր մարկետինգի բաժինը, որը կզբաղվի թիմի մարկետինգով,  բարերարների հետ բանակցություններով, մեծ հաջողությունների կհասնենք»,- հավելեց Արա Պողոսյանը։

Ֆեդերացիայի փոխնախագահը հավելեց, որ ֆինանսների պատճառով այսօր ոչ մի թիմ չի հեռացվի ֆեդերացիայից, բայց իրենք զարգացման համար պետք է որոշեն՝ արժի՞ տվյալ թիմին պահել, թե չէ։