Ձեր վստահելի աղբյուրը

Հայաստան-ԵՄ համաձայնագիրը ստորագրվեց, բայց աշխատանքները նոր են սկսվում: Համաձայնագիրը թեպետ ունի անցումային դրույթներ, սակայն ենթադրվում է, որ ԵՄ անդամ 28 երկրները, գումարած Եվրախորհրդարանը և Հայաստանի ազգային ժողովը, պետք է վավերացնեն այն: «Հայաստանը որպես կամուրջ ԵԱՏՄ և ԵՄ միջև» թեմայով քննարկման ժամանակ այսօր այս մասին հայտարարեց ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը:

«Անցումային դրույթները թույլ են տալիս գործի դնել համաձայնագրի որոշ դրույթներ՝ մինչև վավերացումը: Սակայն բավարարվել դրանով և ասել, որ համաձայանգիրը արդեն կարող է  աշխատել, սխալ է: Համաձայանգիրը քաղաքական փաստաթուղթ է, և որպեսզի այն դառնա իրավական, պետք է վավերացվի: Իսկ իրավական դառնալու նախապայմանը քաղաքական կամքն է և Հայաստանի հետ երկկողմ հարաբերությունների զարգացումը, որովհետև վավերականացումը չպետք է կախված լինի ԵՄ անդամ երկրների ներքին քաղաքական օրակարգերից»,- ասաց խորհրդարանականը:

Արմեն Աշոտյանի խոսքով, Հայաստան-ԵՄ նոր համաձայնագրի վավերացումը ժամանակ է պահանջում: Նա հիշեցրեց Վրաստանի ու Մոլդովայի օրինակը, երբ ԵՄ-ի հետ համաձայնագրերի վավերացումը 1.5- 2 տարի տևեց:

Վերջում խորհրդարանականն ընդգծեց՝ հայկական կողմի մեծագույն ցանկությունն է, որպեսզի Հայաստան-ԵՄ նոր համաձայանգիրը վավերացվի մինչև 2019 թվականի հունիս՝ մինչև գործող Եվրախորհրդարանի լիազորությունների ավարտ:

«Սա շատ բարդ ժամկետ է, բայց իմ ցանկությունը շատ լավատեսական է: Ակնհայտ է, որ մեզնից և մեր եվրոպացի գործընկերներից մեծ ջանքեր են պահանջվելու՝ արագացնելու վավերացման գործընթացը»,- նշեց Աշոտյանը: