Ձեր վստահելի աղբյուրը

Հայաստան-Եմ համաձայնագիրը կարևորագույն հանգրավան կլինի երկկողմ հարաբերություններում: ԵՄ-Հայաստան խորհրդարանական համագործակցության հանձնաժողովի 17-րդ նիստում այսօր այս մասին ասաց ԵՄ-Հայաստան խորհրդարանական համագործակցության հանձնաժողովի համանախագահ, Եվրախորհրդարանի պատգամավոր Սաջադ Քարիմը:

«Այս պատմական նշանակության համաձայնագրի հիմքում մեր երկուստեք հավատարմությունն է ժողովրդավարությանը, իրավունքի գերակայությանը, բարեխիղճ կառավարմանը և մարդու իրավունքների հարգմանը: Փաստաթղթի վավերացումից և ուժի մեջ մտնելուց հետո այն նոր շունչ կհաղորդի մեր քաղաքական երկխոսությանը և կընդլայնի տնտեսական համագործակցության շրջանակը»,- նշեց նա:

Սաջադ Քարիմի խոսքով, նոր համաձայնագիրը խոստումնալից շրջանակ է առևտրի և ներդրումների նոր հնարավորություններ ընձեռելու տեսանկյունից, այն ուղիներ է հարթում քաղաքացիների ազատ տեղաշարժի համար:

«Համաձայնագրի ստորագրումը վկայում է, որ Արևելյան գործընկերությունը բնավ ուղղված չէ մեր հարևաններին ստիպելու ընտրություն կատարել եվրոպական ուղու և այլ գործընկերությունների միջև: Հայաստանն առաջ է ընթանում՝ օգուտ քաղելով ԵՄ կողմից ցուցաբերվող աջակցությունից:

Աջակցության համար, սակայն, կան պայմաններ: Հայաստանը պետք է որոշակի գործողություններ կատարի, այն է՝ բավարարի սահմանված բարեփոխումները՝ պայքարի կոռուպցիայի դեմ, ապահովի լրատվամիջոցների ազատությունը»,- ասաց եվրոպացի պաշտոնյան: