Ձեր վստահելի աղբյուրը

Գլխավոր պողոտայի այգու՝ տարիներ շարունակվող բարեկարգումը սարսափելի վիճակ է ստեղծել այգու շուրջբոլորը, խաթարել հետիոտնի անցուդարձը, երթևեկությունը: Նեղ մայթով անցնել հնարավոր է միայն մեկ ուղղությամբ, երեկոյան ժամերին հատկապես իծաշարուկ է առաջանում:

Մի քանի ամիս է՝ այգու չորս կողմը  թիթեղապատ է:  Արամի փողոցը՝ այգուն, այգին՝ Բուզանդի փողոցին միացնող հետիոտնային անցումները, Մաշտոցի ստորգետնյա երկու անցումները այգու բարեկարգման պատճառով փակ են: Ընդամենը 50 սմ է թողնված մարդկանց  համար:

«Տեսեք, հիմա դիմացիցս մարդ է գալիս: Կամ ես պետք է իջնեմ մայթից, կամ՝ ինքը: Մայթին էլ շատ մոտ ավտոմեքենաներ են կայանած: Կամ պետք է արձան դարձած կպնեմ թիթեղին, մինչև դիմացինս  ինձ հպվելով անցնի, կամ էլ մի ոտքի տեղ գտնեմ, իջնեմ, հետո նորից բարձրանամ»,-Panorama.am-ի  հետ զրույցում դժգոհեց հարակից շենքերի բնակիչներից մեկը՝ Իրինան:





Իրավիճակն ավելի է բարդանում երեկոյան ժամերին, երբ մարդիկ դուրս են գալիս աշխատանքից ու կանգառ գնում:

«Թիթեղները ծռմռվել են, մեխերից դուրս եկել: Լուսավորություն չկա, ոչինչ չի երևում: Ամեն անգամ անցնելիս կամ ոտքներս ենք վնասում, կամ կոշիկները: Հենց երեկ կոշիկս թիթեղի դուրս եկած մասը վնասել է: Օրինական երկրում ապրեինք, կդիմեինք դատարան, ֆինանսական էլ, բարոյական էլ վնասի փոխհատուցում կստանայինք: Արհամարհում են մեզ, ոչ մի տեղ գրած չի, թե երբ են հանելու թիթեղները, երբ են բացելու անցումները: Այգին իբր բարեկարգում են, բայց օր օրի ծառերը պակասում են»,-դժգոհեց մեկ ուրիշ քաղաքացի՝ Սաթենիկը:





Երիտասարդ մի կին էլ՝ Արփիկը պատմեց, որ մի քանի անգամ հենց այդ հատվածում մեքենայի տակ ընկնելուց է պրծել. «Տեսանելիություն չկա, ոչ մի բան չի երևում, փակել են: Թեքվում ես, ու քիչ է մնում, մեքենան ոտքիդ բարձրանա»:

Ստորգետնյա անցումների փակ լինելու պատճառով  մարդիկ հաճախ Մաշտոցի պողոտան կտրում, անցնում են հետիոտնի համար չնախատեսված հատվածով:

«Անցնում եմ, սիգնալ են տալիս վարորդները: Իրանց էլ մեղադրել չի լինի: Բայց օրը երկու անգամ ես պետք է անցնեմ մյուս մայթ, հո չեմ կարող ամեն անգամ հասնել Ամիրյան խաչմերուկ, որ հետիոտնի անցումով անցնեմ: Առաջ հենց այդպես էլ անում էի, բայց  անպատասխանատու իշխանությանը անպատասխանատու վերաբերմունք եմ ցույց տալիս»,-բարկանում է Անժելա Մարտիրոսյանը:







Նրա խոսքով, իրավիճակն ավելի է բարդանում, երբ մի քիչ անձրև է գալիս՝ խցանում, սիգնալ, մարդիկ իրար վրա են բարձրանում:

«Մի անգամ նույնիսկ կողքի մեքենայի բագաժնիկի վրա եմ նստել, որ տեղ տամ սայլակով երեխային անցկացնեն: Կողքից երկու հոգի էլ սայլակն են բարձրացրել, մայրիկին օգնել, որ երեխուն էդ հատվածից կարողանա դուրս բերել: Բա որ մի քիչ ձյուն գա, ի՞նչ է լինելու»,-ասաց նա:

Արամի փողոցում տեղակայված գրասենյակներից մեկի աշխատակիցը՝ Հասմիկը վրդովված նկատեց, որ այդ հատվածն անցնելիս պետք է անընդհատ ակրոբատիկ շարժումներ անել:

«Այգու կողքով մայթ են թողել: Քայլում ես մայթով, մեկ էլ մայթը չկա: Տեղ էլ չկա, որ նույն ուղղությամբ ճանապարհդ շարունակես: Ստիպված նորից փողոցը հատում ես, անցնում դիմացի մայթ: Հասնում ես խաչմերուկին, էլի պիտի հետ անցնես: Լավ կլիներ, որ քաղաքապետը, քաղաքապետարանի աշխատակիցները, թաղապետը մի օր երեկոյան փորձեն քայլել էս հատվածում»,-ասաց քաղաքացին:





Ի դեպ, Արամի փողոցի բազմահարկ շենքերում բավականին հայտնի մարդիկ են ապրում՝ երգիչ-երգչուհիներ, հաղորդավարներ, դերասաններ, քաղաքագետներ, Երևանի ավագանու անդամ, քաղաքապետարանի վարչության պետ և այլք: Նրանց սոցցանցերում երբեք տարածքի անբարեկարգ վիճակի, երեխայի հետ զբոսանքի, իրենց մեքենայի կայանման ու այլ դժվարությունների վերաբերյալ ոչ գրառում, ոչ լուսանկար չի հայտնվել:

Ինչ վերաբերում է այգու բարեկարգմանը, այս պահին ակտիվ աշխատանքներ չեն ընթանում: Մի ցուցանակ կար, որի վրա աշխատանքների ավարտի համար նշված վերջնաժամկետը մի քանի անգամ փոխվեց, հետո ցուցանակն ընդհանրապես անհետացավ: Շարունակվող հողային աշխատանքների պատճառով մի թեթև քամու դեպքում անգամ փոշու հսկա ամպ է գոյանում:
Ի դեպ, քաղաքապետարանը հայտարարել էր, որ այգին բնակիչներին պետք է հանձնվի 2015 թվականի վերջին: