Ձեր վստահելի աղբյուրը

Ի դեմս ՀՀ-ԵՄ համաձայնագրի՝ ականատես ենք լինում, որ ՀՀ-ն ամբողջովին նոր բան է անում. լինելով ԵԱՏՄ անդամ՝ նա նոր հարաբերություններ է ձևավորում ԵՄ-ի հետ։ ԵՄ-Հայաստան խորհրդարանական համագործակցության հանձնաժողովի 17-րդ նիստում այսօր այս մասին ասաց ԵՄ-Հայաստան խորհրդարանական համագործակցության հանձնաժողովի համանախագահ, Եվրախորհրդարանի պատգամավոր Սաջադ Քարիմը:

«ՀՀ-ն սրանով ցույց է տալիս, որ ի զորու է սեփական որոշումներ կայացնել՝ որպես ինքնիշխան պետություն՝ հստակ ձևակերպված ունենալով իր ապագա հավակնությունների սկզբունքները», - նշեց նա։

Քարիմի խոսքով,  սակայն, հայ հանրության մոտ կա որոշակի ապատեղեկատվություն ԵՄ դերի վերաբերյալ։

«Դա չի օգնում ՀՀ քաղաքացիների շրջանում ԵՄ վերաբերյալ ավելի լավ ըմբռնում և ընկալում ձևավորել։ Մենք մեզանից կախված ամեն ինչ կանենք մեր դերը բացատրելու համար։ Հուսով ենք՝ ՀՀ իշխանությունները ևս դա կանեն», - հավելեց նա։

Անդրադառնալով Արցախյան հիմնախնդրի կարգավորման թեմային՝ եվրոպացի քաղաքական գործիչն ընդգծեց, որ Եվրախորհրդարանը պատրաստ է անել ամեն ինչ՝ օգնելու հավուր պատշաճի հանգուցալուծել հակամարտությունը:

Ինչ վերաբերում է Արցախ այցելած անձանց սև ցուցակում ներառելու Ադրբեջանի պրակտիկային, Սաջադ Քարիմի խոսքով, ԵԽ պատգամավորներն ազատ են ցանկացած երկրում  իրականացնել իրենց խորհրդարանական գործունեությունը:

«Երբ ԵԽ պատգամավորն այց է կատարում Արցախ, պետք է հստակորեն ասեն՝ ինչ կարգավիճակով են  այցելում: Եթե ասում են, որ այցելում են ԵԽ անունից և ոչ թե որպես մասնավոր անձ, դա ևս կարող է անառողջ շփոթմունք առաջացնել: Մենք սրան էլ պետք է դեմ լինենք»,- ասաց նա: