Ձեր վստահելի աղբյուրը

Հայաստանում բացվում է «Villa Montessori» միջազգային ասոցիացիայի առաջին կենտրոնը: Դեկտեմբերի 20-ին կենտրոնը դիմավորեց իր ապագա սաներին ու նրանց ծնողներին: «Villa Montessori» կենտրոնի հիմնադիր-տնօրեն Նոնա Վանեցյանը տեղեկացրեց, որ կենտրոնը կբացվի հունվարի 14-ին, իսկ հունվարի 15-ից այն արդեն կգործի: Կենտրոնն ունի մանկապարտեզ և դասապատրաստման բաժին, այստեղ առաջնորդվում են Մոնտեսսորի մեթոդաբանությամբ:

Վանեցյանի խոսքով՝ Միջազգային Մոնտեսսորի ասոցիացիան առաջին անգամ է Հայաստանում, այն ամբողջ Եվրոպայով, ԱՄՆ-ով, Ռուսաստանով տարածում ունի, Ռուսաստանում 4000-ից ավելի մանկապարտեզներ կան և դպրոցներ: Մոնտեսսորի մանկապարտեզ են այցելել շատ հայտնի մարդիկ՝ Google-ի հիմնադիրները, Ջորջ Քլունին, արքայազններ: Վանեցյանը նշեց, որ այս կենտրոն կարող են բերել անգամ երկու ամսական երեխային. մայրիկները երեխաների հետ կարող են ամեն օր 1,5 ժամով այցելել կենտրոն, մինչև փոքրիկն ադապտացվի միջավայրին, որից հետո արդեն կարող են այցելել կես օրով կամ անգամ ամբողջ օրով:

Բոլոր հնարավորությունները կան՝ 10 ամսականում երեխային առանց ծնողի կենտրոնում ընդունելու համար:

Դասապատրաստման կենտրոն կայցելեն 6-15 տաեկան երեխաները, նրանք օրվա մի կեսը կանցկացնեն իրենց դպրոցում, մյուս կեսը՝ այստեղ: Կենտրոնում նրանք երկու անգամ կսնվեն, կսովորեն բոլոր դասերը, այսինքն՝ լրացուցիչ պարապմունքների կարիք չի լինի:

Մանկապարտեզի երեխաների համար կենտրոնի աշխատանքի հիմնական ժամերն են 8:30 – 19:00, սակայն երեխաները հնարավորություն ունեն՝ կես օրով գալ՝ մինչև 13:30 կամ 14:00-19:00: 10 ամսականից 6 տարեկան երեխաներն այստեղ կսնվեն 5 անգամ, որից 3 անգամ՝ առանձին ճաշասենյակում, երկու անգամ՝ ինքնուրույն, ընդ որում՝ կպատրաստեն իրենց իսկ ձեռքով: Կենտրոնի հիմնադիր-տնօրենի խոսքով՝ իրենք այստեղ երեխաներին ինքնուրույնություն են տալիս, սովորեցնում են ինքնուրույն մտածել, գործել և որոշում կայացնել, լինել զարգացած:

Ուսումնական այս կենտրոնում գործում է մաթեմատիկայի գոտի, երեխան այստեղ սովորում է հաշվել 1000-ը, բազմապատկել, բաժանել, գումարել, հանել: Լեզվի գոտում երեք լեզուների միջավայր է գործում՝ հայերեն, ռուսերեն, անգլերեն, այստեղ երեխաներն իրենց բառապաշարն են հարստացնելու, սովորելու են խոսել: Երեխաները նաև աշխարհագրություն ու կենսաբանությունն են ուսումնասիրելու:
Առանձնահատուկ ուշադրություն է դարձվում նաև երեխաների սնվելուն՝ այստեղ երեխաներն առողջ և համեղ սնունդ են ստանալու: Կենտրոնի տնօրենի խոսքով՝ կարևոր է այն, որ երեխան այստեղից դպրոց է գնալու արդեն որպես անհատ: