Ձեր վստահելի աղբյուրը

Այսօր խորհրդարանում իր ելույթի ժամանակ հանրապետական խմբակցության պատգամավոր Գևորգ Կոստանյանն անդրադարձավ  «Դատական օրենսգրքում փոփոխություններ կատարելու մասին» նախագծի քվեարկության շուրջ  բարձրացած աղմուկին։

«Օրենքի փաթեթը լավն է, բայց այնտեղ սկզբունքային հարց կա, որի հետ էլ սկզբունքորեն համաձայն չեմ: Շատերը ընկալում են, որ դա վերաբերում է մեկ դատարան ստեղծելու կամ տաս դատարան ստեղծելու խնդրին, դա իմ խնդիրը չէ, դա կառավարությունը թող որոշի՝ մեկ, թե 50  դատարան է պետք Երևանի վարչական շրջաններում, բայց  խնդիրը հետևյալն է, ինչ կառուցվածք էլ ունենա, դա չպետք է ազդի քաղաքացիների հասանելիության վրա։ Երևան քաղաքի սահմաններում 15, 20 կմ հեռավորության մասին է խոսքը, չնայած ընդդիմախոսներն ասում են` այդ ինչ է որ: Ոչ, այդպես չէ,  այդ նույն սկզբունքով եթե առաջնորդվենք, Երևանում սոցիալական ծառայություն տարբեր վարչական շրջաններում մեզ պետք չէր լինի, պետք չէին լինի նաև անձնագրային ստորաբաժանումներ, Երևանի կենտրոնում մի հատ կունենայինք, բոլոր վարչական շրջաններից կգնային: Վարչական շրջանների բաժանման իմաստը և կառավարման արդյունավետությունը բնակիչների հասանելիությունն է ապահովում»,-մանրամասնեց Կոստանյանը:

ՀՀԿ-ական ատգամավորի խոսքով՝ այս դեպքում ասում են, որ եթե Նոր Նորքի դատարանն ընդդատյա գործող է, բայց դատավորը ծանրաբեռնված է, կարող է գործը հանձնվել Աջափնյակի դատարանին: Կոստանյանը շեշտեց, որ ինքը դրան է դեմ. «Լուծումը` այդ թվում նաև համաշխարհային  պրակտիկայում, դատավորների թվի ավելացումն է»։

Անդրադառնալով դատական քննության ողջամիտ ժամկետների ապահովմանը, Գևորգ Կոստանյանը նշեց, որ, իհարկե, կողմ է` պահպանվեն ժամկետներ, սակայն հավելեց. «Եվրոպական դատարաններում մինչև հիմա բոլոր այն գործերով, որոնցով ճանաչվել է մարդու իրավունքների խախտում, ողջամիտ ժամկետների չպահպանման համար, դրանցից ոչ մեկը դատավորի ծանրաբեռնվածությամբ պայմանավորված չի եղել: Բոլորը պայմանավորված են եղել կոնկրետ դատավորի սուբյեկտիվ վարքագծով: Այսինքն՝ օրինաչափություն առնվազն ԵՄ դատավարության մեջ չկա» ։

Կոստանյանը նաև ընդգծեց, որ քրեական, քաղաքացիական գործով շատ բարդ է վկաների տեղափոխություն ապահովելը։

«Հա, եթե տեսականորեն նստենք, օրենք գրենք՝ շատ հեշտ է, բայց գործնականում տեսեք, թե ինչ պրոբլեմ է առաջացնում՝ թե իրավապահ մարմնի համար, որ ապահովվի վկաներին, թե քաղաքացու համար, որ պետք է ամբողջ քաղաքը կտրի։ Այնտեղ բազմաթիվ այլ գործոններ էլ կան` այդ թվում և ֆինանսական խնդիրներ: Ես ուզում եմ, որ օրենսդրությունը դիտարկենք ոչ թե սկզբունքի տեսակետից, այլ հանրությանը մատչելիություն երաշխավորելու ու ապահովագրելու տեսակետից»,- ամփոփեց պատգամավորը։