Ձեր վստահելի աղբյուրը

Վրաստանի նախկին նախագահ Միխեիլ Սաակաշվիլին բաց նամակ է հրապարակել՝ ուղղված Ուկրաինայի նախագահ Պյոտր Պորոշենկոյին: Այս մասին տեղեկացնում է Apsny.ge-ն: Նամակը Սաակաշվիլին հրապարակել է այն բանից հետո, երբ նախագահի աշխատակազմը՝ ադմինիստրացիան, հրապարակել է նրա առաջին նամակի պարունակությունը:

«Վերջին օրերի զարգացումներն ինձ ստիպում են՝ բաց նամակով Ձեզ դիմել: Մեր հարաբերությունները սկսվեցին բարեկամաբար: Բայց այսօր մենք հասել ենք մի վիճակի, երբ Ձեզ հետ գտնվում ենք բարիկադների հակառակ կողմերում: Ոչ միայն քաղաքական, ես անգամ կասեի՝ աշխարհայացքային: Ես հասկանում եմ, որ այս նամակը դժվար թե ինչ-որ բան փոխի մեր հարաբերություններում: Նախորդ շաբաթ Ուկրաինայի բարեկամ երկրների դեսպանների հետ խորհրդակցությունից հետո Ձեզ անձնական գրություն եմ ուղարկել, որում առաջարկել եմ բանակցություններ սկսել: Ես հաստատել եմ, որ պատրաստ եմ խոսել Ձեզ հետ կամ Ձեր ներկայացուցչի հետ»,- գրել է նա:

Սաակաշվիլին ընդգծել է՝ պետք է պայմանավորվել Ուկրաինայի հետագա ճակատագրի և երկրում իրավիճակի ապակայունացում թույլ չտալու մասին, միայն դա կարող է լինել իրենց երկխոսության առարկան, միայն Ուկրաինայի ճակատագիրն է այսօր իրապես կարևոր, ոչ թե իր կամ Պորոշենկոյի: «Հավատացեք ինձ՝ իբրև փորձառու քաղաքագետի, ով մասնակցել է մի շարք հեղափոխությունների: Դրանք են և Վրաստանում Վարդերի հեղափոխությունը, Նարնջագույն հեղափոխությունը և Ուկրաինայում Արժանապատվության հեղափոխությունը: Եվ ես, և դուք հրաշալի տեսնում ենք, որ քաղաքական ճգնաժամը Ուկրաինային հանգեցրել է լուրջ դրամատիկ զարգացումների սահմանին, որոնցից ես սրտանց կցանկանայի խուսափել»,- ասել է նա:

Սաակաշվիլին նշել է, որ հենց այդ պատճառով է առաջարկել՝ միասին փնտրել այս կոնֆլիկտի լուծման ուղիները: Նա ընդգծել է՝ իր այս առաջարկին Պորոշենկոն արձագանքել է՝ հրապարակելով իրեն ուղղված անձնական գրությունը, ու թեպետ այդ գրության մեջ գաղտնի ոչինչ չկար, սակայն դրանով Ուկրաինայի նախագահը ցույց է տվել, որ ինքը պատիվ չունի: Սաակաշվիլին խոստովանել է՝ ինքը տրվել է այդ սադրանքին, ինչի համար արդեն ներողություն խնդրել է իր աջակիցներից ու բոլոր նրանցից, ովքեր ակամայից դարձել են այդ սադրանքի մասնակիցը:

«Ձեր սադրանքը շատ պարզունակ էր: Ձեր շրջապատից ինչ-որ մեկն իմ աջակիցներին ապատեղեկատվություն էր տվել, որ Հոկտեմբերյան պալատում մեզ մի քանի սենյակ կտան՝ համակարգող շտաբ հիմնելու համար: Ես մարդկանց կոչ արեցի՝ գնալ մեր շտաբ՝ չպայքարել, ոչինչ չկոտրել, վեճի չբռնվել: Երբ ես տեսա, որ այնտեղ մեզ ուժայիններ են սպասում, ես բոլոր ջանքերը գործադրեցի՝ բախումներ թույլ չտալու համար: Իսկ Դուք հուսով էիք, որ բախումներ կլինեն: Ինչպես հետո պարզ դարձավ, Ազգային գվարդիան պալատում էր մեր ցույցից դեռ մեկ ժամ առաջ»,- գրել է նա:

Սաակաշվիլին համոզմունք է հայտնել՝ Ուկրաինան ծանր վիճակում է: Նա խոստովանել է՝ շատ ժամանակ պահանջվեց, որպեսզի ինքը ամբողջապես հասկանա՝ ինչ է կատարվում, սակայն այժմ ակնհայտ է՝ իբրև նախագահ՝ Պորոշենկոն ամենևին էլ չի պատրաստվում պատմության մեջ անմահանալ՝ իբրև նոր Ուկրաինայի հիմնադիր, հակառակը՝ նա, ամենայն հավանականությամբ, կմնա Ուկրաինայի ամենամեծ հիասթափությունն ու հակահերոսը:

«Դուք Ուկրաինայի համար կենսական անհրաժեշտություն ունեցող փոփոխություններ չեք ցանկանում: Դուք սկզբունքայնորեն դրանց չեք հավատում: Ձեզ համար հաջող օրինակներ չդարձան Սինգապուրը, Վրաստանը, Իսրայելը, Ռումինիան, Հարավային Կորեան ու Լեհաստանը, այն երկրները, որտեղ այլ շրջանոևւմ այլ քաղաքական գործիչներ անհրաժեշտ ռեֆորմներ անցկացրեցին, ցույց տվեցին, որ ցանկացած երկիր կարող է վատագույն իրավիճակից ելք գտնել»,- նշված է նամակում:

Սաակաշվիլին ընդգծել է՝ ինքը սխալվել է, երբ հավատացել է, որ Պորոշենկոն իրեն հրավիրել է Ուկրաինա՝ այդպիսի երկիր կառուցելու հարցում օգնելու համար: Նա նշել է՝ Ուկրաինայի նախագահին հուզում է միայն մեկ բան՝ իր միլիարդները, որոնց համար նա պատրաստ է գնալ ցանկացած զոհողության, կեղծիքի և մանիպուլյացիաների:

«Դուք սխալվում եք՝ եթե ինձ դիտում եք իբրև մեծագույն սպառնալիք և արդեն մեկ տարի է՝ Ձեր ուժերը ծախսում եք իմ դեմ պայքարի վրա: Դուք կարծում էիք, որ ինձ Օդեսայի պետական շրջանային վարչություն նախագահի ղեկավարի պաշտոնից ազատելուց հետո իմ մասին շատ արագ կմոռանան: Այս մասին Դուք նախապես էիք մտածել՝ արգելելով մեծ հեռուստաալիքներին՝ շփվել ինձ հետ: Բայց ես սկսեցի հաղորդում վարել ZIK հեռուստաալիքով՝ միակ ալիքը, որ համաձայնեց ինձ հետ աշխատել: Այդ հաղորդմանը հետևում էին միլիոնավոր հեռուստադիտողներ»,- ասել է նա:

Սաակաշվիլին նշել է, որ իրեն չվախեցրեց անգամ ուկրաինական քաղաքացիությունից զրկելը, ինքը շարունակեց պայքարել իր իրավունքների համար: Նա ընդգծել է՝ Պորոշենկոն չի հասկանում մի պարզ բան՝ ոչ թե Սաակաշվիլին է վտանգի մեջ, այլ հենց ինքը: «Ի տարբերություն Ձեզ՝ ես պատրաստ եմ կյանքս ու ազատությունս տալ Ուկրաինայի հաղթանակի համար: Իսկ Դուք պատրա՞ստ եք»,- նշել է:

Նա ընդգծել է՝ իր արտահանձնման ծրագրերը, որ իր մտքում ունի Պորոշենկոն, ոչինչ չեն փոխի: Անգամ եթե իրեն արտահանձնեն՝ Ուկրաինայում շատ մարդիկ կմնան, ովքեր պատրաստ են ընդդիմանալ Պորոշենկոյին ու պայքարել նրա դեմ:

«Մի՞թե պատմությունը Ձեզ ոչինչ չի սովորեցրել»,- նշել է Սաակաշվիլին՝ հավելելով, որ Պորոշենկոյի գլխավոր թշնամին ու սպառնալիքն իր անվերջ ագահությունն է, որի հետ պետք է հաշտվի ողջ Ուկրաինան: Նա նաև նշել է՝ դեռ հավատում է Պորոշենկոյի խելամտությանը, ընդգծել՝ նրա ինքնակամ հրաժարականը աստիճանաբար խորացող քաղաքական ճգնաժամը հաղթահարելու գրեթե վերջին հնարավորությունն է: