Ձեր վստահելի աղբյուրը

Խորհրդարանն այսօր աշխատանքը սկսեց ՀՀ քաղաքացիական դատավարության օրենսգրքում փոփոխություն և լրացում կատարելու մասին և կից ներկայացված օրենքների փաթեթը երկրորդ ընթերցմամբ և ամբողջությամբ ընդունելու հարցի քննարկմամբ։

Հիմնական զեկուցող արդարադատության նախարարի առաջին տեղակալ Արթուր Հովհաննիսյանը հայտնեց, որ առաջին ընթերցումից հետո պատգամավորների կողմից գրավոր առաջարկներ չեն եղել։

«Միայն կառավարությունն առաջարկում է փոքրիկ շտկում կատարել ԴԱՀԿ մասին օրենքում փոփոխություններ և լրացումներ կատարելու մասին օրենքի նախագծում, որով ավելի հստակ են սահմանվում այն դեպքերը, երբ որ կատարողական թերթ է տրվում տարաժամկետ կամ պարբերաբար կատարում պահանջող վարույթների համար»,- ասաց փոխնախարարը։

Մտքերի փոխանակման ժամանակ «Ելք» խմբակցության ղեկավար Նիկոլ Փաշինյանն անդրադարձավ երեկվա իրադարձություններին. «Դատական օրենսգիրքը դրվեց քվեարկության, չանցավ, բայց հայտարարվեց անցած, ուզում եմ հարցադրում դնել, թե իրավական ի՞նչ հիմնավորմամբ, կանոնակարգի ո՞ր օրենքի հիման վրա է ԱԺ նախագահը հաշվառել Ռուստամ Մախմուդյանի բանավոր հայտարարությունը՝ որպես կողմ ձայն։ Հարց է ծագում, ինչպե՞ս, քանի որ գոյություն ունի ԱԺ կանոնակարգի 60-րդ հոդված, որի 7-րդ կետում ասվում է հետևյալը՝ քվեարկության ավարտից հետո նիստը նախագահողը էլեկտրոնային համակարգով իրականացված քվեարկության արդյունքների, ինչպես նաև սույն հոդվածի 5-րդ մասով սահմանված կարգով ներկայացված գրությունների հիման վրա հայտարարում է որոշման ընդունման կամ չընդունման մասին, որից հետո պատգամավորների քվեարկությանը կողմ, դեմ, ձեռնպահ կամ չքվեարկելը չի կարող վիճարկվել կամ փոփոխվել։ Այսինքն՝ կանոնակարգն ասում է, որ մենք ձայները կարող ենք հաշվառել երկու փաստի հիման վրա՝ էլեկտրոնային քվերակություն և գործուղման մեկնած պատգամավորների ծրարներ, չկա որևէ իրավական դրույթ, որ հնարավորություն է տալիս պատգամավորի հայտարարությունը հաշվառվել որպես կողմ ձայն»։

Պատգամավորի խոսքով՝ պետք է տեղի ունենար վերաքվեարկություն. «Երեկվա դատական օրենսգիրքը, ինչպես արդեն ասել էինք, չի ընդունվել և այս պայմաններում պետք է անել համապատասխան հետևություններ»։

«Ելք» խմբակցության պատգամավոր Գևորգ Գորգիսյանն էլ անդրադարձավ Հանրային հեռուստաընկերությամբ երեկ ԱԺ-ում տեղի ունեցածի մեկնաբանություններին։

«Ռեպորտաժից այնպես էր դուրս գալիս, որ «Ելք»-ը հայտարարել էր, թե սա սահմանադրական օրենք է, այնինչ «Ելք» խմբակցությունը միակն էր, որ պաշտպանեց ԱԺ նախագահի հայտարարությունը, և ասեց, այո այդպես է հայտարարել։ Այս ֆոնի վրա «Հ1»-ը ներկայացնում էր, որ «Ելք»-ը չգիտեր, թե ինչ օրենք էր քննարկվում, որոշել էր ինքնագլուխ, որ սա սահմանադրական օրենք է,  հետո պարզվեց, որ այդպես չէ, քանի որ նախարարն այդպես ասաց, հենց-նենց տեղը «Ելք»-ը շուխուր արեց։ Պահանջում եմ պաշտոնապես Հանրային հեռուստաընկերությունից, որպեսզի ներողություն խնդրի «Ելք»-ի բոլոր պատգամավորներից և առհասարակ ԱԺ-ից»,- հայտարարեց պատգամավորը։