Ձեր վստահելի աղբյուրը

Երեկ խորհրդարանական մեծամասնությունը, կառավարության հետ միասին, Ազգային ժողովի դահլիճում ՀՀ սահմանադրությունը դարձրեց հատակի ջնջոց: ԱԺ-ում լրագրողների հետ զրույցում այս մասին ասաց «Ծառուկյան» խմբակցության պատգամավոր Նաիրա Զոհրաբյանը:

«Ես սահմանադրագետ չեմ, բայց կարծում եմ՝ խորհրդարանը պետք է այնքան իրավական կարողություն ունենա, որ որոշի՝ օրենքը սահմանադրական է, թե ոչ: Բայց օրենքի սահմանադրականությունը որոշվում է՝ կախված պահի պատեհությունից: Սա այն է, ինչի մասին մենք խոսեցինք և ինչի արդյունքում «Ծառուկյան» դաշինքն այսօր բոյկոտեց և լքեց նիստերի դահլիճը»,- ասաց նա:

Հարցին՝արդյոք նախագծի քվեարկության հետ կապված խառնաշփոթը ցույց չի՞ տալիս, որ քաղաքական մեծամասնության ներսում հակասություններ կան, Նաիրա Զոհրաբյանը պատասխանեց. «Քաղաքական մեծամասնության կենսակերպը և գործունեությունն ինձ բացարձակապես չի հետաքրքրում: Քաղաքական մեծամասնության բիոռեժիմի հետ կապված բոլոր հարցերով խնդրում եմ դիմել քաղաքական մեծամասնության խոսնակներին»:

Լրագրողները խորհրդարանականից հետաքրքրվեցին՝ ինչո՞ւ «Ծառուկյան» խմբակցության պատգամավոր Նապոլեոն Ազիզյանը երեկ՝ ԱԺ նիստերի դահլիճում գտնվելու պահին չի ընդդիմացել իր իսկ քվեարկության վրիպակին, ինչին ի պատասխան՝ Նաիրա Զոհրաբյանը շեշտեց.

«Եթե դուք նայեք նոր կանոնակարգը, տեղից արված հայտարարությունը իրավական որևէ ուժ չունի: Դա ընդամենը տեղից արված հայտարարություն կլիներ: Նապոլեոն Ազիզյանն իր հայտարարության կերպի վերաբերյալ գրավոր դիմումը հանձնել է ԱԺ քարտուղարությանը: Նա հետամուտ է եղել իր քվեարկությանը: Նա ասեց, որ եղել է տեխնիկական վրիպակ: Մեր խմբակցությունում չի կարող լինել որևէ պատգամավոր, որը որևէ այլ քաղաքական ուժի հետ լատենտ, ստվերային համաձայնություններ և պայմանավորվածություններ ունենա: Ես դա միանշանակ բացառում եմ»:

Իսկ ի՞նչ դիրքորոշում ուներ «Ծառուկյան» խմբակցությունն ի սկզբանե՝ կողմ, թե դեմ պետք է քվեարկեր Դատական օրենսգրքում փոփոխություններ կատարելու մասին նախագծին, հարցին էլ պատասխանեց.

«Մեր խմբակցության տեսակետը վարման կարգով ներկայացրեց մեր խմբակցության պատգամավոր Գևորգ Պետրոսյանը, որովհետև մենք խմբակցությունում քննարկել էինք: Օրենքում ընդհանուր առմամբ դրական տեղաշարժեր կային, բայց մի քանի դրույթներ… Որոշել էինք չմասնակցել, ինչի վերաբերյալ Գևորգ Պետրոսյանը նշեց»: