Ձեր վստահելի աղբյուրը

Արդարադատության նախարար Դավիթ Հարությունյանն ունի իր կարծիքը և ճիշտ չի լինել ասել, որ նրա մոտեցումը հիմք չունի: ԱԺ-ում լրագրողների հետ զրույցում այս մասին ասաց ՀՀ ԱԺ պետաիրավական հարցերի մշտական հանձնաժողովի նախագահ Հրայր Թովմասյանը՝ անդրադառնալով երեկ ԱԺ-ում արդարադատության նախարար Դավիթ Հարությունյանի այն հայտարարությանը, որ ԱԺ-ում քվեարկության ժամանակ իրարանցում առաջացրած «Հայաստանի Հանրապետության դատական օրենսգրքում փոփոխություններ և լրացումներ կատարելու մասին» օրենքի նախագիծը սահմանադրական չէ։

«Նման հիմք կարող է լինել: Բայց այդ դեպքում առաջանալու էր այն մոտեցումը, որ դրանք սահմանադրական էին և այդ դեպքում մեծամասնության հանդեպ կարող էր հնչել մեղադրանք, որ փորձել է հեշտ ճանապարհով գնալ: Եվ եթե կա վեճ, տարբեր ընկալում, ապա մեծամասնությունը պետք է գնա բարդ ճանապարհով, որպեսզի չմեղադրվի, որ գնացել է  հեշտ ճանապարհով»,-նշեց նա։

Հրայր Թովմասյանը հերքեց լուրերն այն մասին, որ իր և Դավիթ Հարությունյանի միջև լարված հարաբերություններ են։

«Անձնական հակասություններ բացարձակ չկան: Ես շատ ջերմ ու ընկերական հարաբերություններ ունեմ Դավիթ Հարությունյանի հետ։ Երբ նախարարը գալիս է ԱԺ, իմ կաբինետում է լինում: Մոռացե՛ք, տենց բաներ մի փնտրե՛ք։ Էսօրվա մամուլն էլ ա էդպիսի բաներ գրում, չկա այդպիսի բան», - նշեց նա։