Ձեր վստահելի աղբյուրը

2017 թվականը Հայաստանի արտաքին քաղաքական գերակայությունների շրջանակներում հաջողված տարի էր։ Այսօր կայացած մամուլի ասուլիսի ժամանակ այս մասին ասաց ԱԺ արտաքին հարաբերությունների մշտական հանձնաժողովի նախագահ, ՀՀԿ փոխնախագահ Արմեն Աշոտյանը:

ԵՄ-Հայաստան նոր համաձայնագրի մասին

«Մեզ հաջողվեց առաջ տանել Հայաստանի ազգային և պետական շահերից բխող օրակարգ, ամրապնդել ՀՀ դիրքերը եղած ձևաչափերում, ինչպես նաև հարաբերություններ հաստատել նոր գործընկերների հետ։ 2017 թվականը Հայաստանի համար նաև անվտանգային համակարգերի ամրապնդման տարի էր։ Մյուս կարևոր ուղղությունն այն է, որ Եվրամիության հետ նոր համաձայնագրի կնքման շրջանակներում ԵՄ-ի հետ հարաբերությունները նոր փուլ թևակոխեցին։ Այս ուղղությունը գալիք տարիների համար համահունչ է լինելու Հայաստանի ներքին քաղաքական և տնտեսական օրակարգին։ Գալիք տարին, կարծում եմ, պետք է դառնա ԵՄ-ի հետ պայմանագրի վավերացման շքերթի տարի»,- ընդգծեց բանախոսը։

Արցախյան հակամարտության մասին

Անդրադառնալով Արցախյան հիմնախնդրի կարգավորման թեմային՝ Արմեն Աշոտյանը  նկատեց, որ 2017 թվականի երկրորդ կեսն ավելի հանդարտ էր, քան առաջինը։ Մասնավորապես, առաջին կեսն անցնում էր սահմանային լարվածության դեպքերով, սադրանքներով և մարդկային կորուստներով։

«Սակայն այս տարի Ժնևում Հայաստանի և Ադրբեջանի նախագահների հանդիպումից հետո լարվածությունը որոշակիորեն թուլացավ։ Ես թույլ լավատեսություն կունենամ այստեղ, որովհետև սահմանին լարվածության անկումը հետևանք չէ ԵԱՀԿ Մինսկի խմբի համանախագահների կողմից առաջարկված մոտեցումների կատարման։ Լարվածության թուլացումը կարող ենք կապել բացառապես Ադրբեջանի ռազմաքաղաքական ղեկավարության «բարի կամքի» կամ անձնական որոշման հետ։ Ցավոք, անձնական որոշումների պատճառով կարող է լինել նաև սրացում։ Հետևաբար, կարևոր եմ համարում Արցախում խաղաղության պահպանման համար ինստիտուցիոնալ մեխանիզմների ստեղծումը»,-ասաց նա։

Արտաքին հարաբերությունների մասին

Խրհրդարանականն իր խոսքում խիստ կարևորեց Հայաստանի հարաբերությունների խորացումը Իրանի և Չինաստանի հետ։

Ըստ Աշոտյանի՝ անցնող տարում Հայաստանը զարգացրեց Չինաստանի հետ հարաբերությունները, դրանք դուրս եկան նոր մակարդակի վրա։ «Հայաստանն ունի իր ուրույն տեղը Չինաստանի առաջարկած «Մեկ գոտի, մեկ ճանապարհ» մեգանախագծում։ Ինչ վերաբերում է Իրանի հետ կապերին, ապա դրանց մակարդակը բավականին բարձր է։ Հայ-իրանական հարաբերությունները պետք է ունենան ինչպես երկկողմ, այնպես էլ տարածաշրջանային արտացոլում։ Այս տարին նշանավորվեց նաև հայ-իսրայելական հարաբերությունների նոր շնչով՝ ոչ միայն ԱԳՆ-ների, այլ նաև խորհրդարանական շփումների մակարդակով»,- նշեց բանախոսը։

Ինչ վերաբերում է հայ-թուրքական հարաբերություններին, ապա ԱԺ արտաքին հարաբերությունների մշտական հանձնաժողովի նախագահի խոսքով, դրանք քաղաքական, տնտեսական և դիվանագիտական ամբողջական փակուղու մեջ են։ Աշոտյանը հիշեցրեց, որ երկկողմ արձանագրությունները, 2018-ի գարնանից սկսած, այլևս քաղաքական օրակարգի մաս չեն լինելու։

«Թուրքիայի՝ իր իսկ երեսը փրկելու բոլոր ջանքերը տապալված են, որովհետև բոլոր ուժային կենտրոնները գիտեն՝ ում պատճառով է տապալվել հարաբերությունների կարգավորման  գործընթացը։ Թուրքիայի դիվանագիտական լկտիությունն այլևս չի թաքցնում, որ հայ-թուրքական կարգավորումները շաղկապված են Արցախյան հիմնախնդրի՝ ադրբեջանամետ լուծումների հետ »,- ամփոփեց պաշտոնյան։