Ձեր վստահելի աղբյուրը

«Ռուսական մամուլում Գարեգին Նժդեհի մասին բացասական նյութեր գլխավորապես տեղ են գտնում Ադրբեջանի ջանքերով: Սրանք Կրեմլի կողմից պատվիրված ռեպորտաժներ կամ հաղորդումներ չեն, քանի որ հայկական կողմի բողոքից անմիջապես հետո հեռացվում են հեռուստաալիքների յութուբյան էջերից: Ավելին, մի քանի օր անց եթեր են հեռարձակվում հայամետ շեշտադրումներով հաղորդումներ»,-լրագրողների հետ այսօր կայացած հանդիպման ժամանակ այս մասին ասաց մեդիափորձագետ Տիգրան Քոչարյանը՝ անդրադառնալով ՌԴ պաշտպանության նախարարության «Զվեզդա» ալիքով վերջերս եթեր հեռարձակված հակահայ թողարկմանը:

Նրա խոսքով, ադրբեջանցիները տասնյակ հազարավոր դոլարներ են ծախսում հակահայ նյութեր պատվիրելու և տարածելու համար: Սակայն շատ լրատվամիջոցներ, անգամ գումարի դիմաց, հրաժարվում են այդպիսի նյութեր պատրաստել: Այս գործում մեծ դերակատարություն են ունենում ռուսական ԶԼՄ-ներում բարձր պաշտոններ զբաղեցնող հայերը:

Տիգրան Քոչարյանի խոսքով, սակայն, հույսը չպետք է այս հանգամանքի վրա դնել և «արխայինանալ»:

«Մենք տարբեր հարթակներում պետք է ավելի ակտիվ աշխատենք և հասկանանք, որ ռուսական լրատվամիջոցներում թոփ պաշտոններ զբաղեցնող հայերը միաժամանակ ՌԴ քաղաքացիներ են և պարզ չէ՝  պետական շահերի բախման ընթացքում ինչ դիրք կգրավեն»,- նշեց մեդիափորձագետը՝ օրինակ բերելով հատկապես «Russia Today»-ի գլխավոր խմբագիր Մարգարիտա Սիմոնյանին: