Ձեր վստահելի աղբյուրը

ՀՀ բնապահպանության նախարար Արծվիկ Մինասյանն այսօր լրագրողների հետ հանդիպման ընթացքում անդրադառնալով Ախթալայի կոմբինատի պոչատարում օրեր առաջ տեղի ունեցած վթարին, որի  հետևանքով պոչանք  տարածվել էր Ախթալայի թիվ 2 դպրոցի բակ, նշեց, վթարի փաստով վարույթ է հարուցվել, և այս պահին ձեռնպահ է մնում հայտարարություններ անելուց:

«Հարցը տեսչական մարմնի ուղիղ հսկողության տակ է, իսկ Բնապահպանության նախարարությունն այստեղ հանդես է գալիս ոչ միայն ահազանգը փոխանցողի, այլ մասնագիտական մոտեցումները ներկայացնելու դերում»,- նշեց նախարարը:

Ինչ վերաբերում է պատասխանատվությանը, Արծվիկ Մինասյանը վստահեցրեց, որ   գործի քննության ավարտից հետո ավելի պարզ կլինի անձանց պատասխանատվությունը՝ վարչական կամ քրեական առումով:

Դիտարկմանը՝  նորմա՞լ է, որ վթարի հետևանքով տեղի ունեցած արտահոսքը օրեր շարունակ չի մաքրվել դպրոց տարածքից, և դրա համար կոմբինատը շահագործող ընկերությունը պատասխանատվության չի ենթարկվել, նախարարը պատասխանեց. «Աննորմալ է, երբ նման իրավիճակների ժամանակ առաջին արձագանքը շատ արագ չի լինում, դրա համար համակարգային փոփոխություններ ենք իրականացնում»:

Նա լրագրողներին հորդորեց սպասել քննության ավարտին, եթե պատասխանատվություն չկրեն, ապա նոր քննադատեն:

Արծվիկ Մինասյանը նշեց նաև, որ տարիներ շարունակ Հայաստանում ընդերքի մասին օրենսդրությունը կառուցված է եղել հետևյալ սկզբունքով՝  անձը ազատ է գործելու, անձը ստանում է թույլտություն և որևէ ձևով հնարավոր չէ նրա հետ հարցեր պարզել: Հիմա, ըստ նրա, ընդերքօգտագործման մասին նոր օրենքով խստացվելու են շահագործողներին ներկայացվող պահանջները, ընդլայնվելու են ստուգողական գործիքները։ Ըստ նախարարի, նոր փաստաթղթում անդրադարձ կա նաև պոչամբարներին։