Ձեր վստահելի աղբյուրը

ԱԺ պատգամավոր Ռուստամ Մախմուդյանի համար անցնող տարին նշանավորվել է օրենսդրական մի շարք նախաձեռնություններով հանդես գալով: Դրանց թվում են եղել եզդի ժողովրդի նկատմամբ ցեղասպան գործողությունների դատապարտման վերաբերյալ նախագիծը, տուժողի նկատմամբ արագացված դատաքննություն կիրառելու դեմ առարկության օրինագիծը, որտեղ պատգամավորը հանդես է եկել որպես համահեղինակ, ինչպես նաև շահումով խաղերի և խաղատների մասին օրինագիծը: Օրենսդրական առաջին նախաձեռնությանը նրան միացել են ՀՀԿ-ական պատգամավորներ Վահրամ Բաղդասարյանը և Արմեն Աշոտյանը:

Ինչպես լրագրողների հետ այսօր կայացած հանդիպման ժամանակ ասաց խորհրդարանականը, իր գործունեության մյուս կարևոր ուղղությունը եղել է քաղաքացիների ընդունելություն կազմակերպելը՝ ինչպես մարզային այցելությունների ժամանակ, այնպես  էլ ԱԺ վարչական շենքում:

«Թեև չեմ կարող ասել, որ քաղաքացիների թիվը մեծ է եղել, այնուամենայնվ դիմած մարդկանց առաջին ակնկալիքը ֆինանսական աջակցություն ստանալն է, երկրորդը՝ դատական վեճերին համապատասխան միջամտություն ցուցաբերելու խնդրանքը»,- նշեց Ռուստամ Մախմուդյանը:

Ինչ վերաբերում է ԱԺ պետաիրավական մշտական հանձնաժողովի աշխատանքներին՝  պատգամավորն ընդգծեց, որ այնտեղ իր սպասածից ավելի ծանր աշխատանքի հանդիպեց:

Անդրադառնալով ընտանեկան բռնության մասին օրենքի նախագծի ապագա կիրառելիությանը՝ Ռուստամ Մախմուդյանը նշեց.  «Կապրենք կտեսնենք»: Նրա համոզմամբ, գործնականում օրենքի կիրառելիության մասին խոսելը դժվար է այնքանով, որքանով դժվար է ասել՝ մարդիկ ինչ չափով կկարևորեն թեկուզ փոքրիկ բռնարարքները: