Ձեր վստահելի աղբյուրը

Աջ ղեկով մեքենա ունեցող քաղաքացիներն այսօր էլ փողոց էին դուրս եկել:  Նրանք համարում են, որ տրանսպորտի և կապի նախարարության որոշումը խախտում է իրենց իրավունքները:

Հիշեցնենք, որ նախաարարությունը ներկայացրել է կառավարության որոշումներում փոփոխություններ կատարելու նախագծեր՝   առաջարկելով 2018 թվականի ապրիլի 1-ից ժամանակավորապես արգելել աջակողմյան ղեկային տեղաբաշխմամբ տրանսպորտային միջոցների ներմուծումը Հայաստանի Հանրապետություն:

Նախարարությունը հիմնավորում է. «Հայաստանի Հանրապետությունում աջակողմյան ղեկային տեղաբաշխմամբ տրանսպորտային միջոցների շահագործումը երթևեկության համար վտանգ է ներկայացնում, քանի որ  աջակողմյան երթևեկության դեպքում տրանսպորտային միջոցի վարորդը ունի սահմանափակ տեսանելիություն: Մասնավորապես, կանգառի կամ կայանման վայրից տրանսպորտային միջոցի շարժումն սկսելու, երթևեկության գոտի վերադասավորվելու, երթևեկության ուղղությունը փոփոխելու, վազանց կատարելու և այլ դեպքերում:

 Հաշվի առնելով վերը նշվածը, նախագծերով առաջարկվում է ժամանակավորապես արգելել աջակողմյան ղեկային տեղաբաշխմամբ տրանսպորտային միջոցների ներմուծումը, իսկ հետագայում նաև շահագործումը Հայաստանի Հանրապետությունում»:

Վարորդները սակայն համաձայն չեն հիմնավորման հետ: Նրանք դժգոհ են նաև, որ շահագործման հնարավոր արգելքի պարագայում փոխհատուցում չի տրամադրվելու:

Panorama.am-ին ՃՈ-ի տրամադրած տվյալների համաձայն, այս տարվա ինը ամիսների ընթացքում  Հայաստանում հաշվառվել է 2553 ճանապարհատրանսպորտային պատահար, որոնց հետևանքով զոհվել է 200, մարմնական վնասվածքներ ստացել՝ 3784 մարդ: Աջ ղեկով մեքենաների մասնակցությամբ տեղի է ունեցել 242 ճանապարհատրանսպորտային պատահար, որոնց հետևանքով զոհվել է 9, մարմնական վնասվածքներ ստացել՝ 369 մարդ:

Ոստիկանությունից նաև հայտնել էին, որ 2012 թվականից մինչև 2017 թվականի հոկտեմբերի 16-ը տրվել է 1881 աջ ղեկային կառավարման համակարգով տրանսպորտային միջոցի ձախակողմյան վերասարքավորման թույլտվություն: