Ձեր վստահելի աղբյուրը

Անցնող տարում Հայաստանի համար ամենամեծ և ամենակարևոր քաղաքական իրադարձությունը եղավ ԵՄ հետ համագործակցության մեկնարկը: Դեկտեմբերի 28-ին լրագրողների հետ հանդիպմանը նման գնահատական տվեց ՀՀ արտակարգ և լիազոր դեսպան Արման Նավասարդյանը: Նա նկատեց՝ դա այնպիսի մի փաստաթուղթ է, որի իրագործումը միշտ շաղկապված է հայկական կողմի հետ:

«Սա երկկողմ փաստաթուղթ է, եթե չարեցինք կամ չունեցանք այն, ինչ պետք է ունենանք, ապա այդ ամենը կմնա իբրև «ձայն բարբառոյ յանապատի»: Պետք է աշխատել քրտնաջան, նպատակամղված: Արտաքին քաղաքականության հաջողությունը կապված է ներքին քաղաքականության հետ, եթե չունենանք այն, ինչ պետք է ունենանք մեր տանը, մեզ ոչ ոք ոչինչ չի տա»,- ասաց նա:

2017-ին գրանցված մյուս հաջողությունն, ըստ բանախոսի, ՀԱՊԿ-ում վերջերս եղած հայտարարությունն էր, որ շոշափում էր նաև ՀՀ և ԼՂՀ շահը: Նավասարդյանը հույս հայտնեց, որ նախագահ Սերժ Սարգսյանի հանդիպումը Վրաստանի իր գործընկերոջ հետ իսկապես կարող է ճանապարհ բացել Հայաստանի բեռնափոխադրումների համար, ինչը շատ կարևոր է:

Խոսելով ԼՂ հարցի մասին՝ Նավասարդյանը նշեց, որ տեղաշարժ չկա, սակայն բարեբախտաբար պատերազմական գործողություններ էլ չկան: Նա ընդգծեց՝ պետք է ուշադրություն դարձնել Արցախի ԱԳ նախարար Մասիս Մայիլյանի հայտարարությանը, որ վերաբերում է ձևաչափին ԼՂ խնդրի կանոնակարգման: ԼՂ խնդրի կարգավորմանը Իրանի հնարավոր մասնակցության մասին խոսելիս քաղաքագետն ասում է, որ ձևաչափի փոփոխության դեպքում պետք է չմոռանալ Թուրքիայի մասին, ով ջանքեր է գործադրում՝ մասնակից դառնալ այդ խնդրի կարգավորմանը: 

«Եթե ապագայի մասին խոսենք, թե ինչ է մեզ սպասվում 2018 թ., մեր բոլոր խնդիրների լուծումը սերտորեն կապում եմ աշխարհաքաղաքական խնդիրների և առաջին հերթին՝ ԱՄՆ ու Ռուսաստանի քաղաքականության հետ, գնալ իրադարձությունների հետևից՝ սա դիվանագիտության մեջ ամենավատ ֆորմուլան է, որ ոչ մի արդյունք չի տալիս»,- ասաց նա:

Նավասարդյանի խոսքով՝ ԼՂ հարցում մի լավ կողմ գոյություն ունի՝ այն մի կետ է, որտեղ ԱՄՆ-ն ու ՌԴ-ն կոնսենսուս ունեն, եթե այն քանդվի, ի՞նչ կլինի: Նա նշեց, որ Երուսաղեմի հարցում ԱՄՆ-ի որոշմանը դեմ քվեարկելիս Հայաստանը պետք է հիշեր այդ մասին:

Արտակարգ և լիազոր դեսպանն ասաց, որ լուրջ գործընթացներ են կատարվում Նախիջևանում. դրանք կարող են վտանգավոր հետևանքներ ունենալ Հայաստանի համար:

«Այնտեղ տեղի է ունենում Թուրքիայի ներթափանցում ռազմական առումով, Ադրբեջանը, փաստորեն, երկրորդական դիրքեր է գրավում, ամբողջն իր ձեռքն է վերցնում Թուրքիան: Չանդրադառնալով հարցին, թե ինչ սպառազինություններ են կուտակվում, ինչ պայմանավորվածություններ կան, նշեմ, որ մեր դիվանագիտության խնդիրներից մեկն այսօր պետք է լինի մոսկովյան և Ղարսի պայմանագրերի վերանայումը, որպեսզի արգելափակվի այն առաջընթացը, որ այսօր տեղի է ունենում Նախիջևանում, նախ՝ Ադրբեջանի հետ կապված: Բացառված չէ, որ Նախիջևանը կարող է մտնել Ադրբեջանի կազմի մեջ»,- ասաց նա:

Նավասարդյանը նաև նշեց՝ պետք է արգելափակել Թուրքիայի գործողությունները, որ, Աստված մի արասցե, երկու ճակատ չունենանք: