Է.Նալբանդյան. «Դա շա՞տ է, թե՞ քիչ»
2018 թվականը՝ Հայաստանում լի է լինելու մի քանի կարևորագույն հոբելյաններով, նաև լի է լինելու աննախադեպ իրադարձություններով և դիվանագիտական իրադարձություններով: Այս մասին այսօր Ամանորի և Սուրբ ծննդյան տոների առթիվ ՀՀ արտաքին գործերի նախարարությունում կազմակերպված ընդունելությանը ժամանակ ասել է նախարար Էդուարդ Նալբանդյանը:
Ընդունելությանը մասնակցել է նաև ՀՀ նախագահ Սերժ Սարգսյանը:
Արտաքին գործերի նախարար Էդուարդ Նալբանդյանն իր խոսքում մասնավորապես նշել է.
«Մեծարգո պարոն Նախագահ,
Տիկնայք և պարոնայք դեսպաններ,
Հարգելի գործընկրներ,
Սիրելի բարեկամներ,
Այս տարի ևս Հանրապետության Նախագահը մեզ պատվել է իր բարձր ներկայությամբ՝ միասին նշելու գալիք Ամանորը: Մեզ հետ են Հայաաստանում հավատարմագրված դեսպանները։
Վստահ եմ մտովի մեզ հետ են այսօր նաև աշխարհով մեկ մեծ նվիրումով ծառայող Հայաստանի Հանրապետության դիվանագետները։
Ոչ միայն Հայաստանում, այլ նաև շատ այլ երկրներում ընդունված է տարեմուտը դիմավորել բարեկամների շրջապատում: Այսօր այստեղ հավաքվածները բարեկամներ են, որոնց միավորում են նաև Հայաստանի երկկողմ ու բազմակողմ բարեկամական կապերի առավել ամրապնդման համատեղ ջանքերը:
Անցնող տարում մենք ձեռք-ձեռքի տված նոր էջեր ենք լրացրել մեր արտաքին հարաբերությունների տարեգրությունում: 2017թ.-ին մենք նշեցինք շատ երկրների հետ նորանկախ Հայաստանի դիվանագիտական հարաբերությունների հաստատման ու միջազգային կազմակերպություններին անդամակցության առաջին քառորդ դարը։
Դա շա՞տ է, թե՞ քիչ։ Քիչ է, իհարկե, եթե նկատի ունենանք մեր ժողովրդի հազարամյակների պատմությունը։ Սակայն, դրանք քսանհինգ յուրահատուկ տարիներ էին, որոնց ընթացքում ներդրված մեծ ջանքերի շնորհիվ Հայաստանը բարեկամական կապեր հաստատելով տարբեր աշխարհամասերի բազմաթիվ երկների հետ՝ այսօր միաջազգային բեմահարթակում հանդես է գալիս որպես վստահելի գործընկեր։
Այդ քսանհինգ տարիների յուրաքանչյուր Ամանորը յուրահատուկ քննության պահ է եղել՝ արձանագրելու այն ինչ հաջողվել է իրականացնել, առաջ նայելու և ծրագրելու հետագա անելիքները։ 2018 թվականը՝ Հայաստանում լի է լինելու մի քանի կարևորագույն հոբելյաններով, նաև լի է լինելու աննախադեպ իրադարձություններով և դիվանագիտական իրադարձություններով։
Թող գալիք տարին լինի խաղաղության, հաջողությունների և ձեռքբերումների տարի՝ Ձեր համար, պարոն Նախագահ, մեր երկրի ու ժողովրդի, բոլորիս համար»։
Լրահոս
Տեսանյութեր
Մայր տաճարի վերանորոգման համար պետության կողմից ֆինանսական աջակցություն չի եղել. Մուշեղ Սրբազան
