Ձեր վստահելի աղբյուրը

Հայաստանից միգրացիոն հոսքերը շարունակում են զանգվածային բնույթ կրել: Այս տարի տնային տնտեսությունների 35 տոկսից ավելին ինչ-որ ձևով մասնակից է եղել միգրացիոն գործընթացներին: Նախորդ տարվա համեմատ 2  տոկոս աճ է նկատվել: Այսօր կայացած մամուլի ասուլիսի ժամանակ այս մասին ասաց ժողովրդագիր Ռուբեն Եգանյանը:

Նրա խոսքով, միգրացիոն հոսքերի համար  արտաքին լուրջ գործոն հանդիսացել է Հայաստանի ԵԱՏՄ անդամակցությունը: Օրինական հիմունքներով, պայմանագրերով արտերկրում աշխատելու հեռանկարը գայթակղել է հազարավոր մարդկանց:

«Միգրացիայի տնտեսական ներուժը շարունակում է նվազել՝ չնայած այն բանին, որ ներմուծվող գումարներն աճել են: Միգրացիան այլևս աղքատությունից խուսափելու միջոց չէ: Շատ են այն ընտանիքները, որոնք միգրացիայի արդյունքում տնտեսական վիճակի ոչ թե բարելավում են ունենում, այլ վատթարացում: Եթե նախկինում միգրացիան գոյատևման ռազմավարություն էր, այսօրվա դրությամբ այն վտանգներ է պարունակում»,- նշեց բանախոսը՝ հավելելով, որ միգրացիոն հոսքերի զգալի մասը բաժին է հասնում Ռուսաստանին:

Անդրադառնալով ժողովրդագրական տվյալներին՝ Ռուբեն Եգանյանը նշեց, որ 2018 թվականին ծնելիության ավելի ցածր մակարդակ է գրանցվելու, քան այս տարի: Մասնավորապես, 7-8 տոկոսով ավելի քիչ երեխաներ են ծնվելու: Արձանագրվելու է մահացածների թվի աճ, ամուսնությունների թիվը նվազելու է:

«Վերարտադրական տարիք են մուտք գործել 90-ականների կեսերին ծնվածները: Նրանք թվաքանակով քիչ են, հետևաբար նաև քիչ երեխաներ կունենան: Ծնելիության ամենաբարձր մակարդակը Հայաստանում գրանցվել է  1986 թվականին՝ 81 հազար երեխա, ամենացածր մակարդակը նկատվել է 2002 թվականին՝ 32 հազար: Ինչ վերաբերում է ծնելիության  ներկա մակարդակին, ապա պարզ վերարտադրություն այլևս տեղի չի ունենում, նեղացող վերարտադրսություն է նկատվում»,- ամփոփեց բանախոսը: