Ձեր վստահելի աղբյուրը

Իրանում վերջին լայնածավալ ցույցերը նպատակ ունեին ոչ այնքան հեղափոխություն կատարելու և Իրանի վարչակարգը տապալելու, որքան ցուց տալու Իրանի ղեկավարության թույլ կողմերը, որոնք օգտագործելով՝ Արևմուտքը կարող է պայքարել նրա իսկ դեմ: Լրագրողների հետ այսօր կայացած հանդիպման ժամանակ նման համոզմունք հայտնեց թուրքագետ Մուշեղ Խուդավերդյանը:

«Արևմուտքի նպատակը ոչ թե Իրան պետության ոչնչացումն է, այլ ընդամենն Իրանում այնպիսի իշխանություն հաստատելը, որը համահունչ կլինի արևմտյան շահերին և չի սպառնա Արևմուտքի ազգային անվտանգությանը: Իրանում ցույցեր հրահրելն ուներ նաև այլ նպատակ: Թերևս Ռուսաստանի ու Չինաստանի դաշնակից երկրներին թուլացնելով՝ հետագայում թուլացնել նաև այդ գերտերություններին»,- նշեց բանախոսը:

Մուշեղ Խուդավերդյանի խոսքով, իրանական ցույցերի կազմակերպմանը խառնված է ոչ միայն ԱՄՆ-ը, այլ նաև իսրայելական «Մոսադը», ինչից կարելի է եզրակացնել, որ այդ երկրին ձեռնտու են Իրանի թուլացումն ու իսլամական իշխանության փոփոխությունը:

«Իսրայելը նպատակ ունի Իրանում իշխանություն փոխելով՝ թուլացնել մահմեդական երկրների միասնությունը: Այդ միասնությունը չի բխում ինչպես Արևմուքի, այնպես էլ Իսրայելի շահերից: Այնպես որ, Իրանում ցույցերի ավարտը ոչ այնքան ավարտ է, որքան մեծ գործընթացի սկիզբ: Արևմուտքը փոձում է հասկացնել, որ Իրանի դեմ պայքարելու է ինչպես արտաքին, այնպես էլ ներքին լծակներով: Միաժամանակ, ակնհայտ է, որ Իրանում հեղափոխություն անելը բավական բարդ է՝ անգամ արևմտյան հատուկ ծառայությունների համար»,- շեշտեց թուրքագետը՝ հավելելով, որ ներքին ցույցեր հրահրելով՝ արևելյան և արևելյան բլոկները փորձում են ստուգել հակառակորդի ամրությունը:

Հարցին՝ որքա՞ն վտանգավոր են Իրանի ցույցերը Հայաստանի համար՝ հաշվի առնելով երկու երկրների սահմանակից լինելը, Մուշեղ Խուդավերդյանը նկատեց, որ Իրանում ցանկացած խլրտում կարող է իր անմիջական ազդեցությունը թողնել ՀՀ ազգային անվտանգության վրա: «Իրանում ցանկացած ապակայունացում բերում է տարածաշրջանում հակամարտությունների սրման նոր օջախների առաջացման: Խոսքը նույնիսկ կարող է  վերաբերել ղարաբաղյան խնդրին, երբ տարածաշրջանային անկայունությունն օգտագործելով՝ ադրբեջանական կողմը կարող է առիթից օգտվել և պատերազմ սանձազերծել»,- ընդգծեց բանախոսը:

Անդրադառնալով թուրք հասարակական գործիչ Օսման Քավալայի ձերբակալության թեմային՝ թուրքագետը նկատեց, որ վերջինս Արևմուտքի մարդկանցից մեկն է Թուրքիայում: «Նա վերջին տարիներին Արևմուտքից բավական մեծ գումարներ էր ստանում և փորձում Թուրքիայում ամրապնդել արևմտյան ազդեցությունը: Քավալայի ձերբակալությունը տեղավորվում է գյուլենականներին ձերբակալելու տրամաբանության մեջ, քանի որ թուրք գործիչը ակտիվորեն համագործակցում էր ընդդիմադիր գործիչ Ֆեթուլլահ Գյուլենի հետ»,- նշեց բանախոսը:

Ինչ վերաբերում է Թուրքիայի նախագահ Ռեջեփ Էրդողանի փարիզյան վերջին այցին՝ Մուշեղ Խուդավերդյանը նկատեց, որ այցի ենթատեքստը Թուրքիայի-ԵՄ հարաբերությունների բարելավումն էր: Մինչդեռ եվրոպական մի շարք երկրների ղեկավարներ հայտարարել են, որ այս տարի ևս Թուրքիան, ամենայն հավանականությամբ, մուտք չի գործի ԵՄ: