Ձեր վստահելի աղբյուրը

«Ձմեռային երաշտի վտանգ այս պահին չկա»,-Panorama.am-ի հետ զրույցում հայտնեց գյուղատնտեսության փոխնախարար Աշոտ Հարությունյանը:

Նա ուրախ է, որ գիշերները գրանցվում է 0-ից ցածր ջերմաստիճան, ցերեկներն էլ շատ տաք չի լինում: Առկա պայմաններում աշնանացանին ցրտահարություն չի սպասվում,  երկարամյա տնկիներում հյութաշարժություն չի սկսել:

«Հիմա եթե կտրենք խաղողի որթը, մեջը ջուր կլինի: Եթե ձմեռային երաշտ լինի, հնարավոր է բույսի մեջ եղած խոնավությունը գնա դեպի հողը: Այս դեպքում բույսը կարող է չորանալ ցրտից կամ տաքից, այլև ձմեռային երաշտից: Այս պահի դրությամբ, նորից եմ կրկնում, երաշտի վտանգ չկա»,-բացատրեց գյուղնախարարության ներակայացուցիչը:

Հուսադրող են նաև առաջիկա օրերի եղանակի վերաբերյալ կանախատեսումները՝ ջերմաստիճանը նվազելու է,  հունվարի 13-ից կլինեն տեղումներ:

«Եթե լինի 0-ից ցածր ջերմաստիճան ու տեղումներ, ապա այն կլինի ձյան տեսքով: Եթե լինի ձյան կայուն շերտ, նշանակում է, որ աշնանացանի ցրտահարության վտանգ չի լինի, իսկ բազմամայա տնկարկներն էլ չեն բողբոջի»,-ասաց Հարությունյանը:

Նրա խոսքով, հանրապետության տարածքում հնարավոր է լինեն հատուկենտ ծառեր, որոնք բողբոջել են, ընդհանուր առմամբ բողբոջած ծառեր չկան:

Վտանգ չի սպառնում նաև մեղուներին: Նախարարության հորդորները տեղ են հասել: Ինչ վերաբերում է ոռոգման ջրի կուտակման հնարավոր դժվարություններին, ապա Ա. Հարությունյանի խոսքով, այս պահին հողի սահմանային խոնավությունը կա:

«Ֆիքսենք, որ այս պահին ինչ կա՝ դրական է: Անասնակերի խնայողություն է կատարվում, քանի որ ոչխարները դրսում են արածում, ջերմատները հեշտ են տաքացվում, ինչն էլ բերում է կուլտուրաների ցածչ ինքնարժեքի, գյուղացիներն էլ վառելիքը քիչ են օգտագործում»,-թվարկեց փոխնախարարը: