«Ելք»-ը միակ ուժն է, որը փորձում է «նստել կառավարության շնչին». Թևան Պողոսյան

Քաղաքական 11:35 10/01/2018 Հայաստան

Այն, որ ԵԱՏՄ-ն Հայաստանին իր պահանջներն էր ներկայացնելու, բոլորին էր հայտնի, հայտնի էր նաև, որ մի խումբ ապրանքներ հունվարի 1-ից թանկանալու են: Սակայն կառավարությունը դեռ ամիսներ առաջ պետք է պատրաստեր հանրությանն այս ամենին, բայց Հայաստանում նման մշակույթ չկա: Այսօր տեղի ունեցած մամուլի ասուլիսի ժամանակ այս մասին ասաց «Մարդկային զարգացման միջազգային կենտրոնի» նախագահ, փորձագետ Թևան Պողոսյանը:

«Կառավարությունը չի կարողանում Հայաստանում տնտեսական միջավայր ձևավորել: Մենք վերցնում ենք մեծ վարկեր, սակայն տնտեսությունը տնտեսություն չի դառնում, ենթակառուցվածքներ չեն ձևավորվում: Կառավարությունը պետք է լիակատար փոխի նոր տնտեսական մոդելի ձևավորման մոտեցումները»,- ասաց նա:

Թևան Պողոսյանը դրական գնահատեց «Ելք» դաշինքի՝ հունվարի 19-ին թանկացումների դեմ երթ կազմակերպելու նախաձեռնությունը՝ նկատելով, որ վերջինս քաղաքական միակ ուժն է, որը փորձում է «նստել կառավարության շնչին»:

«Ամեն մեկն իր բաժին ընդդիմությամբ փորձում է իր քաղաքականությունը տանել: «Ելք»-ի նախաձեռնությունը պետք է ողջունել: Պետք է իրավիճակ փոխել, որպեսզի կոալիցիան հասկանա՝ աշխատել և տեղից շարժվել է պետք: Կոալիցիան պետք է զգա, որ իր շնչին նստած են: Ինչքան շատ մարդ նրա շնչին նստի, անելիքներն ավելի արագ կկատարվեն»,- ասաց փորձագետը:

Անդրադառնալով կառավարության իրականացրած քաղաքականությանը՝ Թևան Պողոսյանը հույս հայտնեց, որ հանրությունն, այնուամենայնիվ, կկարողանա կառավարությանը բացատրել՝ ժամանակն է հիմնավորելու քայլերը, քայլեր կատարելուց առաջ տեղեկացնել մարդկանց: «Միայն Կենտրոնական բանկի աշխատանքը՝ պահպանելու ֆինանսական կայունությունը, բավարար չէ: Կառավարությունն իր հերթին պետք է նպաստի տնտեսական վիճակի բարելավմանը»,- շեշտեց փորձագետը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: