Ձեր վստահելի աղբյուրը

Երևան-Հրազդան երթուղին սպասարկող ընկերությունը, որը ուղեվարձը 400 դրամից բարձրացրել է 500 դրամի, դրա իրավունքն ունեցել է: Այսօր լրագրողների հետ զրույցում ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը նշեց, որ երթուղին շահագործող ընկերությունը  ժամանակին մրցույթը շահել է 500 դրամով, ուստի  իրավունք ուներ իր հաշվին այդ գինն իջեցնելու, բայց բարձրացնելու իրավունք չուներ:

«Այսօր ինքը բերել է մրցույթի գնին համապատասխան, բայց հանդիպելով իրենց հետ՝ կարող է ժամանակի ընթացքում փոխի այդ որոշումը»,- նշեց նախարարը:

Հարցին, թե կա՞ն այլ ընկերություններ, որոնք նույնպես մրցույթը շահել են ավելի բարձր գնով, սակայն  երթուղին շահագործում են ավելի ցածր գնով և չի բացառվում, որ դրանք ևս ուղեվարձը բարձրացնեն, Վահան Մարտիրոսյանն ասաց, որ մի քանի նման ընկերություններ կան, սակայն չի կարող նշել այդ ընկերությունների ցանկը: Նա միաժամանակ նշեց, որ շուտով ներկայացնելու են միասնական տրանսպորտային համակարգ, որի արդյունքում ընդհանուր պատկերը կփոխվի:

Հարցին, թե արդյոք առաջիկայում ևս սպասվում են ուղեվարձի թանկացումներ, Վահան Մարտիրոսյանը պատասխանեց. «Մեր կողմից ուսումնասիրություններ կարվեն ցանկացած այն ընկերությունների մոտ, որտեղ կունենանք այդպիսի դեպքեր: Մի քանի ընկերություններ կան, բայց եթե իրենք ժամանակին իրենց հաշվին առաջարկել են ցածր գին, մենք պետք է այսօր նայենք, թե այդ առաջարկված գինը համապատասխանում է, իրենց ստացած շահույթն ինչքան է, գերշահույթ է, թե ոչ, հետո կորոշենք: Այսօր եղել է այդ մի դեպքը, մնացածը կանոնակարգվելու է տրանսպորտային միասնական համակարգը ներկայացնելուց հետո»: