Ձեր վստահելի աղբյուրը

ՀՀ կառավարության որոշմամբ ապրիլի 1-ից կարգելվի աջակողմյան ղեկային տեղաբաշխմամբ տրանսպորտային միջոցների ներմուծումը Հայաստան:

Այսպիսով, գործադիրն այսօրվա նիստում հավանություն տվեց «Աջակողմյան ղեկային տեղաբաշխմամբ տրանսպորտային միջոցների ներմուծման  ժամանակավոր արգելքի մասին», «Հայաստանի Հանրապետության կառավարության  2007 թվականի հունիսի 28-ի թիվ 955-Ն որոշման մեջ լրացումներ կատարելու մասին»  և «Հայաստանի Հանրապետության կառավարության  2010 թվականի սեպտեմբերի 9-ի թիվ 1251-Ն որոշման մեջ լրացում կատարելու մասին» որոշումների նախագծերին:

Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, ներկայացնելով նախագիծը, նշեց, որ «Ճանապարհային երթևեկության անվտանգության ապահովման մասին» ՀՀ օրենքով սահմանվում է, որ  Հայաստանի ճանապարհներին սահմանված է տրանսպորտային միջոցների աջակողմյան երթևեկություն: Դրանով պայմանավորված, ըստ նախարարի, ՀՀ-ում ճանապարհային երթևեկության կանոնները սահմանված են ձախակողմյան ղեկային կառավարմամբ տրանսպորտային միջոցների երթևեկությանը համապատասխան, ինչպես նաև մյուս բոլոր տեխնիկական միջոցները, ճանապարհային նշանները, գծանշումները, լուսացույցերը տեղակայված են՝  հաշվի առնելով ձախակողմյան ղեկային կառավարվող տրանսպորտային միջոցի վարորդի համար տեսանելի և ընկալելի լինելու հանգամանքը:

Հետևաբար, աջակողմյան ղեկային կառավարմամբ տրանսպորտային միջոցների շահագործումը երթևեկության համար վտանգ է ներկայացնում, քանի որ  աջակողմյան երթևեկության դեպքում տրանսպորտային միջոցի վարորդն ունի սահմանափակ տեսանելիություն: Մասնավորապես, կանգառի կամ կայանման վայրից տրանսպորտային միջոցի շարժումն սկսելու, երթևեկության գոտի վերադասավորվելու, երթևեկության ուղղությունը փոփոխելու, վազանց կատարելու և այլ դեպքերում:

Ըստ Վահան Մարտիրոսյանի՝ աջակողմյան ղեկով մեքենաները պարունակում են ճանապարհատրանսպորտային պատահարների առաջացման ռիսկեր:

Հաշվի առնելով վերանշյալը՝ նախագծերով նախատեսվում է արգելել աջակողմյան ղեկային կառավարման համարգ ունեցող մեքենաների հաշվառումն ու շահագործումը 2018 ապրիլի 1-ից: Նշված սահամանափակումը չի տարածվելու մինչև  ապրիլի 1-ը ներմուծված աջ ղեկ ունեցող մեքենեների վրա: Տվյալ տրանսպորտային միջոցների սեփականատերերը  սեփականության տնօրինման իրավունքով կարող են ազատ շահագործել, հաշվառել և վերահաշվառել իրենց մեքենաները:

Նիստը վարող Վաչե Գաբրիելյանը հարցրեց՝ արդյոք դա նշանակում է, որ որևէ  քաղաքացի, որն այժմ ունի աջ ղեկով մեքենա, որևէ սահմանափակման չի՞ ենթարկվում, այսինքն՝  կարող է թե օգտագործել, թե օտարել, թե այլ կերպ տնօրինել այդ մեքենան:

Տրանսպորտի նախարար Վահան Մարտիրոսյանը վստահեցրեց, որ մինչև ապրիլի 1-ը ներմուծված մեքենենարը  կարող են ազատ շահագործել, հաշվառվել և վերահաշվառվել: «Այսինքն,  ոչ միայն այն քաղաքացիները, որոնք ունեն նման մեքենաներ, այլև նրանք, որոնք պատվիրել են, օրինակ՝ այդ մեքենաները կհասնեն հաջորդ շաբաթ կամ մեկ ամիս հետո, ապա նրանց վրա ևս կտարածվի այս որոշումը»,- ասաց Վաչե Գաբրիելյանը: Նախարարն ի պատասխան նշեց, որ  նրանց վրա ևս կտարածվի, մինչև ապրիլի 1-ը Հայաստան  ներկրված մեքենաների վրա որևէ  սահմանափակում չի լինելու:

Փոխվարչապետը հետաքրքրվեց՝ կա՞ վիճակագրություն ու խնդիրներ իրականում առաջացե՞լ են, թե՞ խնդիրները տեսական են:

«Գիտեք, նախ մտահոգությունները կան օրենքից ելնելով, բացի դրանից, ըստ ոստիկանության ու ապահովագրական ընկերությունների տվյալների՝ վթարների քանակը տոկոսային հարաբերակցությամբ աջ ղեկով մեքենաների մասնակցությամբ մոտ 28 տոկոսով ավելի է»,- նշեց Վահան Մարտիրոսյանը:

Բացի այդ, ըստ նրա, վթարների ժամանակ վիրավորների թիվը մոտ 39 տոկոսով ավելի է: «Դա լուրջ թիվ է, և առաջին հերթին մտածելով ժողովրդի անվտանգության մասին, գնացել ենք այդ որոշման»,- հավելեց նախարարը: 

Վաչե Գաբրիելյանը հանձնարարեց՝ ամբողջականացնելու համար այս նախաձեռնությունը՝ հարկ է օրենսդրական սահմանափակումներ մտցնել ներմուծման վերաբերյալ:

«Խնդրում եմ պատրաստել համապատասխան օրինագիծ և ներկայացնել կառավարությանը եկող շաբաթ, որպեսզի անհետաձգելի կարգով ուղարկենք Ազգային ժողով», - ասաց Վաչե Գաբրիելյանը: