Ձեր վստահելի աղբյուրը

«Ժառանգություն» կուսակցությունը բազմիցս ասել է, որ որևէ քաղաքական ուժ միայնակ ոչինչ անել չի կարող։ Հաջորդ շաբաթ կայանալիք վարչության նիստից առաջ (որում կքննարկվեն ապրիլից առաջ որոշ հանրային գործողություններ կազմակերպելուն առնչվող հարցեր խմբ.), Panorama.am-ի թղթակցի հետ զրույցում այս մասին ասաց «Ժառանգություն» կուսակցության փոխնախագահ Արմեն Մարտիրոսյանը։

Թե ինչ գործողությունների կդիմի կուսակցությունն ապրիլից առաջ, Մարտիրոսյանը չկոնկրետացրեց, միայն նշեց, որ ամեն ինչ կախված է իրավիճակից։

«Միասնություն կլինի, թե ոչ, չեմ կարող ասել, որովհետև դա ակնհայտորեն ոչ միայն մեզնից է կախված, այլև գործընկերներից։ Կարևոր է այն, թե հասարակությունն ինչ վիճակում կլինի, որքնան ակտիվ կլինի։ Բացի այդ՝ աշխարհաքաղաքական վիճակն անընդհատ փոփոխվում է։ Այս կամ այն պետության նկատմամբ տարբեր պատժամիջոցներ են կիրառվում։ Դրանք կարող են նաև Հայաստանի վրա ազդեցություն  գործել։ Այսինքն՝ բազմավեկտոր գործոններ կան, և այդ գործոններն անընդհատ փոփոխվում են, դրա համար կոնկրետ ոչինչ ասել չեմ կարող»,- նշեց ժառանգական գործիչը։

Հարցին՝ ապրիլից առաջ հանրահավաքներ նախատեսվո՞ւմ են, Արմեն Մարտիրոսյանը պատասխանեց՝ ըստ անհրաժեշտության կորոշեն։

Նա հրաժարվեց պատասխանել մեր այն հարցին, թե հնարավո՞ր է՝ ինչ-որ փուլում «Ժառանգությունը» հանդես գա «Երկիր Ծիրանի» կուսակցության հետ, որը հունվարի կեսերից պատրաստվում է հանդես գալ համահայկական ընդվզման նախաձեռնությամբ։

«Այդ քաղաքական ուժին առնչվող հարցերին չեմ պատասխանում։ Որևէ մեկնաբանություն չեմ կարող անել, քանի որ Զարուհի Փոստանջյանը հայտարարել է, որ իրենք ոչ մի գործընկեր չունեն։ Եթե չունեն, ի՞նչ մեկնաբանեմ»,-ասաց Մարտիրոսյանը՝ հավելելով, որ որևէ քաղաքական ուժի անձնապես չեն հրավիրել՝ մասնակցելու իրենց նախաապրիլյան հնարավոր միջոցառումներին։

Հիշեցնենք՝ «Ժամանակ»-ի հետ զրույցում «Ժառանգություն» կուսակցության  վարչության փոխնախագահ Արմեն Մարտիրոսյանը  նշել է, որ օրերս Հայաստան է  վերադարձել «Ժառանգություն» կուսակցության ղեկավար Րաֆֆի Հովհաննիսյանը։

 «Ըստ ամենայնի, հաջորդ շաբաթ կուսակցության վարչության նիստ կհրավիրի՝ փորձելով ապրիլից առաջ որոշ հանրային գործողություններ կազմակերպել»,-գրել է թերթը։