Ձեր վստահելի աղբյուրը

Որևէ մեկը՝ այդ թվում՝ «Ծառուկյան» դաշինքի  համակիրները, զրկված չեն «Ելք»-ի՝ թանկացումների դեմ հավաքներին ակտիվ մասնակցություն ունենալու իրավունքից: Դա մարդկանց սահմանադրական իրավունքն է: ԱԺ-ում լրագրողների հետ զրույցում այս մասին ասաց «Ծառուկյան» խմբակցության պատգամավոր Գևորգ Պետրոսյանը:

«Ինչ վերաբերում է մեր խմբակցության՝ Հարկային օրենսգրքում փոփոխություններ անելու պահանջին միանալուն, ապա «Ծառուկյան» խմբակցությունը ժամանակին հրապարակային կերպով  դեմ է արտահայտվել Հարկային օրենսգրքի փոփոխություններին: Մենք օրենքով վերապահված մեր լիազորություններից որևէ մեկում չենք թերացել՝ կանխելու այս թանկացումները: Բայց հայտնի է, որ քաղաքական մեծամասնությունն անցկացրեց իր որոշումը»,- ասաց նա:

Պատգամավորի խոսքով, բնական է, որ թանկացումների ուղղությամբ իրենք հանդես կգան նախաձեռնություններով:

«Հիմա մենք մեզնից կախված ամեն հնարավորն անում ենք և ընդամենը գնալ, պատգամավորներով մասնակցել «Ելք»-ի փողոցային երթին, սա չի միակ տարբերակը: «Ծառուկյան» դաշինքը միշտ էլ կանգնած է եղել ժողովրդի կողքին, բայց ընդամենը նրա համար,որ ընդդիմադիր մեկ այլ խմբկցություն հայտարարել է երթեր, ցույցեր անելու մասին, դա բավարար չէ , որ մենք պարտավոր համարենք մասնակցել դրանց»,- նշեց Գևորգ Պետրոսյանը: