Առաջարկվում է ստեղծել միասնական երթուղային ցանց. Գագիկ Գրիգորյան
«Հանրապետության բոլոր համայնքների տրանսպորտային սպասարկումն ապահովելու նպատակով առաջարկվում է ստեղծել միասնական երթուղային ցանց, որի շրջանակներում հնարավոր կլինի կազմակերպել արդյունավետ ուղևորափոխադրում գյուղերից դեպի մարզկենտրոն կամ մարզի խոշոր քաղաք, այնուհետև դեպի Երևան»,- խորհրդարանում «Ավտոմոբիլային տրանսպորտի մասին» ՀՀ օրենքում փոփոխություններ կատարելու մասին օրինագծի քննարկման ժամանակ հայտարարեց հիմնական զեկուցող, ՀՀ տրանսպորտի, կապի և տեղեկատվական տեխնոլոգիաների նախարարի առաջին տեղակալ Գագիկ Գրիգորյանը։
Նրա մանրամասնեց, որ նախատեսվում է միասնական երթուղային ցանց ձևավորելու համար միավորել միջմարզային և ներմարզային երթուղային ցանցերը և դրանց ձևավորումը վերապահել տրանսպորտի, կապի և տեղեկատվական տեխնոլոգիաների նախարարությանը. «Երթուղիների սպասարկման մրցույթներն իրականացնել մեկ փաթեթով, որը կներառի մարզկենտրոնից կամ մարզի խոշոր համայնքից դեպի մյուս համայնքները երթուղիների մրցույթները մեկ փաթեթով։ Արդյունքում կընտրվի մեկ կամ երկու փոխադրող յուրաքանչյուր մարզի համար, որոնք կսպասարկեն մարզի բոլոր երթուղիները»։
Հանրապետական խմբակցության պատգամավոր Շուշան Սարդարյանը փոխնախարարը հետաքրքրվեց. «Արդյոք կարիքների գնահատման ուսումնասիրություն իրականացվե՞լ է, քանի որ համայնքներ կային, որոնք դուրս էին մնում երթուղային ցանցերից, քանի որ մրցույթներին չէին մասնակցում ոչ եկամտաբեր համարվելու տեսանկյունից։ Նաև` ի՞նչ սկզբունք է դրվել, որ հնարավորինս շատ համայնքներ ներառվեն»։
Փոխնախարարը պատասխանեց, որ դեռ 2017-ի ուսումնասիրությունների արդյունքում 230 համայնք չէր սպասարկվում, ձեռնարկված միջոցառումներով` 2017թ-ի վերջին 170-ի է հասել այդ համայնքների թիվը. «Նոր երթուղային ցանցի կազմի համար հիմանական գաղափարն այն է, որ բոլոր ցանցերը պետք է ինտեգրված լինեն միմյանց և մեծ ուշադրության դարձնելու համար բերվում են մեկ լիազոր մարմնի ենթակայության տակ: Անհրաժեշտության դեպքում կլինեն չվացուցակներ, բոլոր համայնքները հնարավորություն կունենան տրանսպորտային սպասարկում ունենալ դեպի մարզկենտրոն, ու նաև Երևան քաղաք»:
Պատգամավորի հարցին՝ թե որևէ ձևով ազդեցություն կունենա՞ սա ուղեվարձերի վրա, Գագիկ Գրիգորյանը պատասխանեց, որ այս փուլում իրենք պիլոտային ծրագիր են իրականացում Արմավիրի մարզում. «Առաջին հերթին` գաղափարն այն է, որ որոշ չափով եկամտաբեր երթուղայինները, փոխկապակցվելով, լինեն ոչ եկամտաբեր երթուղիների հետ, այսինքն՝ սպասարկեն ոչ թե մեկ կամ երկու երթուղի, այլ ամբողջ ցանցը։ Ինչ վերաբերում է գնագոյացմանը, ապա այն ազատականացված է գինը: Բայց, իրականում, կա մեթոդոլոգիա, որ հաշվարկում է գների գոյացումը։ Մենք կարծում ենք, որ կկարողանանք զսպել և չթողնել, որ անհարկի բարձր գներ լինեն, դա հիմնավորված կլինի»։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
