Ձեր վստահելի աղբյուրը

Այս տարի տոնական օրերին Հայաստանում թունավորման դեպքերն ավելի շատ են եղել: Մահվան որևէ դեպք չի գրանցվել:

«Մինչև հունվարի  15-ը սուր թունավորումների բաժանմունք է ընդունվել 46 հիվանդ, նախորդ տարվա 36-ի փոխարեն: Այս տարի առավել շատ էին ալկոհոլային խմիչքից թունավորման դեպքերը: Եթե անցած տարի ունեցել ենք 10 դեպք, ապա այս տարի՝ 21 դեպք»,-լրագրողների հետ հանդիպմանը նման տվյալներ ներկայացրեց  ԱՆ գլխավոր թունաբան Միքայել Գաբրիելյանը:

Բուժօգնության դիմած հիվանդներից  9-ի մոտ թունավորման պատճառը գազն է եղել:

Ամփոփելով 2017-ի դեպքերը, Մ. Գաբրիելյանը նշեց, որ ավելացել են օձի կծածի դեպքերը: Ընդհանուր առմամբ 2017-ին գրանցվել է թունավորման 944 դեպք, 2016-ին՝ 991 դեպք:

«2016-ին ամբողջ հանրապետությունում գրանցվել էր 97 դեպք, անցած տարի եղել է 146 հիվանդ: Մահվան մեկ դեպք է եղել»,-ասաց նա:

Մասնագետը փաստում է, որ 2016-ի համեմատ 2017-ին գրեթե կրկնակի ավելացել են գազի հետևանքով թունավորման դեպքերը: Ալկոհոլային խմիչքի թունավորման դեպքերը ևս ավելացել են, եթե 2016-ին եղել է 363 դեպք, որից չորսը մահվան ելքով, ապա 2017-ին գրանցվել է 322 դեպք, որից վեցը՝ մահվան ելքով:

«Մահացողները խրոնիկ ալկոհոլիզմով տառապող մարդիկ են, հիմնականում անօթևան: Ես շեշտում եմ, որ Հայաստանում կեղծված, վատորակ խմիչքի հետևանքով թունավորումներ չեն լինում, դրանք լինում են խմիչքի չարաշահման հետևանքով»,-ասաց թունաբանը:

Նա ցավ հայտնեց, որ վերջին տարիների ընթացքում ալկոհոլից թունավորվածների շրջանում մեծ թիվ են կազմում երիտասարդ տղաները,  աղջիկները և կանայք: