Ձեր վստահելի աղբյուրը

ԲՀԿ-ն ոչ թե անձնական խնդիրներ ունի կառավարության հետ, այլ իրականությանը տիրապետելով՝ քննադատում է ընդհանուր գործելաոճը: Լրագրողների հետ զրույցում այսօր այս մասին ասաց ԲՀԿ ղեկավար Գագիկ Ծառուկյանը՝ անդրադառնալով կառավարության նկատմամբ դիրքորոշման հնարավոր խստացմանը:

«Դե հիմա կտեսնենք: Քննարկենք և կտեսնենք: Դուք տեսաք՝ փոքր ու միջին բիզնեսի հետ խնդրում մենք էլի մենակ մնացինք՝ թեկուզ այդ մարդիկ դիմել էին բոլոր խմբակցություններին: Կազմակերպեցինք, որ պատասխանատու օղակների ներկայացուցիչները հանդիպեն ժողովրդի հետ: Ժողովրդին ասում էին՝ «Ուզում ենք օգնել ձեզ, որ ոչ թե հինգ տոկոս վճարեք, այլ տոկոսուկես: Ժողովուրդը պատասխանեց՝ «Հինգ տոկոս վճարում ենք, պատրաստ ենք երեք տոկոս էլ ավել վճարել, մենակ թե մեզ հանգիստ թողեք»: Մենք ժողովրդի կողքին կանգնեցինք. մարդիկ հաց են վաստակում, կարողանում են իրենց ընտանիքը պահել»:

Լրագրողները Գագիկ Ծառուկյանից հետաքրքրվեցին՝ արդյոք ՀՀ նախագահ Սերժ Սարգսյաննն իր համար անփոխարինելի անձ է: «Ինձ համար անփոխարինելի մարդ գոյություն չունի: Երբ ՀՀԿ-ն իր թեկնածուին ներկայացնի, մենք այդ մասին մեր կարծիքը կասենք»,- ընդգծեց վերջինս:

Իսկ արդյունավե՞տ է համարում ՀՀ վարչապետ Կարեն Կարապետյանի աշխատանքը: «Այդ հարցին դուք պատասխանեք, ձեր վրա զգացեք: Անցած տարի էիք լավ ապրում, թե այս տարի: Կարող եք դուրս գալ փողոց ցանկացածին այդ հարցը տալ: Եթե դրական պատասխանեն, ձեր հարցի լիարժեք պատասխանը կստանաք»,- ասաց նա:

Հարցին՝ ինչո՞ւ է հաճախ բացակայում ԱԺ նիստերից, Ծառուկյանը պատասխանեց՝ պատգամավորների 90%-ը գալիս է, վազելով ներկա ստանում, մեկ ժամ հետո խորհրդարանը դատարկ է:

«Ոչ թե հազվադեպ եմ գալիս, այլ դուք հիմնականում պետք է զգաք ու տեսնեք, որովհետև ամբողջ ժողովուրդը ձեզնից է ինֆորմացիա ստանում: Ծառուկյանը գործով է զբաղվում, Ծառուկյանի` միայն մեկ ամիս առաջ կատարածը, որ Եվրախորհրդարանից բերեց 70 պատգամավոր, որից 20-ին տարավ Ղարաբաղ, ինձ թվում է, որևէ խորհրդարանի պատգամավոր իրա ամբողջ կյանքում այդպիսի արդյունավետ աշխատանք չի կատարել, էլ չեմ ասում` մյուսը, մյուսը: Մարդը պետք է գործով ապացուցի, արդյունավետ լինի, ոչ թե` Ծառուկյանը եկավ, ներկա գրանցվեց, ոնց որ հիմա ներկա գրանցվեցի, դուրս եկա, դա նշանակում է արդյունավետ աշխատա՞նք, մարդու գործը պետք է գնահատել»:

Հարցին էլ` նրա 157 բացակայություններից ԱԺ աշխատակազմը 121-ը հարգելի է համարել, ի՞նչ փաստաթղթեր է ներկայացնում, ԲՀԿ ղեկավարը պատասխանեց. «Համապատասխան դիմեք, ձեզ կներկայացնեն»:

Նշենք, որ լրագրողների և Ծառուկյանի խոսակցությանը միջամտեց Նաիրա Զոհրաբյանը և ասաց, որ պետք է այդ հարցերն ուղղել ԱԺ աշխատակազմին, սակայն դա դուր չեկավ Ծառուկյանին և նա սաստեց Զոհրաբյանին, ապա շարունակեց. «Ծառուկյանին սիրես, թե չսիրես, պետք է նայես նրա կատարած գործը, դու դրական ես համարում, թե` բացասական»: