Ձեր վստահելի աղբյուրը

2018 թվականին Հայաստանի համար ԵԱՏՄ միասնական մաքսատուրքերի փոփոխությունն էական ազդեցություն չի կարող ունենալ մի շարք լայն սպառման ապրանքների գնի վրա: Այս մասին այսօր լրագրողների հետո հանդիպման ժամանակ ասաց ՀՀ Տնտեսական մրցակցության պաշտպանության պետական Հանձնաժողովի նախագահ Արտակ Շաբոյանը:

«Խոսքը ընդհանուր առմամբ սոցիալական նշանակության 4-5 ապրանքի մասին է՝ կարագ, հավի միս, ձեթ, ձուկ և կաթնամթերք, որոնց մասով, նախ մեր երկիրը բավականին զարգացած տեղական արտադրություն ունի, ինչի հաշվին հիմնականում պահանջարկը բավարարվում է, և, ապա, այդ ապրանքների հիմնական մասը ներկրվում է հենց ԵԱՏՄ-ից և ոչ երրորդ երկրներից»,- նշեց նա: 

Արտակ Շաբոյանը նշեց, որ Հայաստանում որոշ ապրանքատեսակներ էժանացել են։ Մասնավորապես,  շաքարավազի գինը նվազել է 13.3 տոկսով. 1 կգ շաքարավազի գինը 392 դրամից  դարձել է 339 դրամ:

«Մենք հետևում ենք և պարտադրում ենք բոլոր խոշոր տնտեսվարողներին, որ նրանց  գնային քաղաքականությունը համահունչ լինի միջազգային շուկայում գների փոփոխություններին»,-ասաց ՏՄՊՊՀ նախագահը՝ հավելելով, որ  միջազգային շուկայում էլ նվազել է շաքարավազի գինը։

Ըստ նրա՝ շաքարավազի գների նվազման վրա ազդեցություն է ունեցել նաև մրցակցության խորացումը. այս պահի դրությամբ շաքարավազ ներկրում է  56 տնտեսվարող. «Ճիշտ է նրանք շաքարավազ ներկրում են սեփական արտադրության մեջ օգտագործելու նպատակով, բայց դա նշանակում է, որ այս ոլորտում  մուտքի խոչընդոտներ չկան»:

Արտակ Շաբոյանը հայտնեց նաև, որ 2017թ-ին նվազել է հավի մսի, ձեթի, ոսպի, ոլոռի, ալյուրի, հնդկաձավարի, կաթնամթերքի գները: