Ձեր վստահելի աղբյուրը

Դատավորների անկախության հարցը դատական համակարգի կայացման կարևորագույն խնդիրներից է: Այսօր Երևանում «Քաղաքացիական հասարակության նկատառումները դատական և քրեական օրենսգրքերի նախագծերի» վերաբերյալ հանրային քննարկմանը փաստաբան Հայկ Ալումյանն առանձնացրեց դատավորների ֆինանսական անկախության հարցը:

Նրա խոսքով՝ պետք է գիտակցել, որ դատավորը ֆինանսական կախման մեջ չէ կողմերից մեկից:

Փաստաբանը նշեց՝ դատական գործերի ութսուն տոկոսը, խոսքը քաղաքացիական գործերի մասին է, բանկին է վերաբերում, այսինքն՝ մեծ մասամբ կողմերից մեկը լինում է բանկը, հիմնականում բանկերն են դատի տալիս քաղաքացուն, հակառակը հազվադեպ է լինում:

Ալումյանի խոսքով՝ պետք է հայտարարագրել այս կամ այն բանկի հետ տվյալ դատավորի ունեցած հարաբերությունները, կարող է պարզվել՝ նա շատ մեծ կախման մեջ է տվյալ բանկից:

Հաջորդ խնդիրն, ըստ Ալումյանի, դատարանների նախագահների դերն է. վերջիններիս նշանակում է հանրապետության նախագահը:

«Դատարանների նախագահին տրված է իրավունք՝ դատավորի կողմից առերևույթ խախտում հայտնաբերելու դեպքում նա պիտի դիմի էթիկայի և կարգապահական հարցերի հանձնաժողովին: Ենթադրվում է՝ նա ունենալու է իրավունք նաև սեփական քննություն անցկացնելու: Սա կարող է դատավորին լուրջ կախման մեջ դնել դատարանի նախագահից»,- ասաց նա:

Փաստաբանին մտահոգում է նաև բարձրագույն դատական խորհրդի որոշումների բողոքարկման հարցը: Այս խորհուրդը դատավորներին դատական պատասխանատվության ենթարկելու կամ լիազորությունների դադարեցման հարցերը քննարկելիս փաստորեն հանդես է գալիս որպես դատարան:

Ըստ Ալումյանի՝ պետք է օրենսդրությամբ այս խորհրդի որոշումները որևէ ձևով վիճարկելու հնարավորություն լինի, սակայն չկա, ուստի հնարավոր չէ խուսափել կամայականություններից, ասել, որ նախագծով կարգավորումներն ավելի դրական են:

Փաստաբանի խոսքով՝ պետք է նաև հաշվի առնել, որ ներկայում էթիկայի և կարգապահական հարցերի հանձնաժողով աշխատանքը, գործունեությունը լիարժեք փակ է, թափանցիկ չէ: