Ձեր վստահելի աղբյուրը

Եթե «Ելք»-ը և «Ծառուկյան» դաշինքը միասին վերցրած, չեն կազմում այն ցուցանիշը, որ կարողանանք հաղթել, ինչո՞ւ պետք է մասնակցենք նախագահական ընտրություններին: ԱԺ-ում լրագրողների հետ զրույցում այս մասին ասաց ԲՀԿ ղեկավար Գագիկ Ծառուկյանը՝ պատասխանելով հարցին, թե ինչու իր ղեկավարած քաղաքական ուժը նախագահի միասնական թեկնածու առաջադրելու հարցում չաջակցեց «Ելք»-ին:

Լրագրողները Ծառուկյանից հետաքրքրվեցին՝ հնարավոր է, որ դաշինքը սատարի նախագահի ՀՀԿ-ական թեկնածուին:

«Ամեն ինչ հնարավոր է: Այսօր մենք չգիտենք՝ թեկնածուն ով է: Եթե այսօր մեր ժողովուրդը լիարժեք իրավունք է տվել Հանրապետական կուսակցությանը՝ որոշելու, ներկայացնելու և ընտրելու առանց մեզ և առանց «Ելք»-ի, ինչի՞ մասին է խոսքը» ,- ասաց նա:

Իսկ հնարավո՞ր է, որ ԲՀԿ-ն հայտնվի կոալիցիայում, հետաքրքրվեցին լրագրողները: Գագիկ Ծառուկյանն ասաց, որ «եթե»-ներով հարցերի չի պատասխանում, այնուհետ ավելացրեց, որ նման հարց իրենք չեն քննարկել:

Հաջորդ հարցին՝ անձամբ ինքն ունի նախագահի նախընտրելի թեկնածու, ԲՀԿ ղեկավարը կոնկրետ պատասխան չհնչեցրեց, կրկնեց նախորդ միտքը: