Ձեր վստահելի աղբյուրը

Հանրապետական խմբակցության անդամ, ՄԻԵԴ-ում ՀՀ կառավարության լիազոր ներկայացուցիչ Գևորգ Կոստանյանն աննախադեպ չի համարում  Ալեքսանդր Արզումանյանի հայցով ՄԻԵԴ կայացրած վճիռը:

«Աննախադեպ չէ: Վճռով հաստատվել է այն փաստը, որ կալանավորման պրակտիկան մեր երկրում կատարելագործման կարիք ունի, և շատ ժամանակ խախտվում են մարդու իրավուքնները: Կարծում եմ, որ դա որևէ մեկի համար անակնկալ չէր»,-ԱԺ-ում լրագրողների հետ զրույցում ասաց Կոստանյանը:

Նա հիշեցրեց, որ վերջին մեկ տարվա ընթացքում Հայաստանի Հանրապետության նախագահ երեք առիթներով մտահոգություն է հայտնել  ու համապատասխան հանձնարարականներ տվել կալանքի պրակտիկան փոխելու անհրաժեշտության վերաբերյալ:

«Եվրոպական դատարանը հաստատեց դա, որ կալանավորման ընթացքում չեն պահպանվել կոնվենցիոն և օրենքի  պահանջները, չի հիմնավորվել կալանքի անհրաժեշտությունը Արզումանյանի ու այլ պարագայում» , - նշեց Կոստանյանը:

Կոստանյանը փաստեց, երբ Արզումանյանը վիճարկել է իր իրավունքի խախտումը ՄԻԵԴ-ում դեսպան չէր.

«Այն հանգամանքը, որ դեսպան լինելով նման վճիռ կայացվեց, կարծում եմ դրական նշանակություն ունի այն իմաստով, որ մեզ համար որևէ նշանակություն չունի, թե ում իրավունքն է խախտվել՝ կլինի իշխանության մեջ չգտնվող, թե իշխանության մեջ գտնվող անձի»:

ԱԺ պատգամավորը նշեց, որ վճռից պետք է հետևություններ արվեն, կատարվեն օրենսդրական փոփոխություններ:

Հիշեցնենք, որ Ալեքսանդր Արզումանյանը բողոքարկել էր իրեն կալանքի տակ պահելու հանգամանքը՝ «Փողերի լվացման»  գործով։ Ալեքսանդր Արզումանյանը ձերբակալվել էր 2007 թվականի մայիսին և կալանավորվել ապօրինի եկամուտների օրինականացման կասկածանքով։ Կալանավորումից հետո նա դիմել էր Մարդու իրավունքների եվրոպական դատարան, որն էլ շուրջ 11 տարի անց՝ այս տարվա հունվարի 11-ին բավարարել է Ալեքսանդր Արզումանյանի բողոքը: Մասնավորապես, ՄԻԵԴ-ը որոշել է, որ այս գործով տեղի է ունեցել Մարդու իրավունքների եվրոպական կոնվենցիայի 5-րդ և 3-րդ հոդվածների խախտում: