Ձեր վստահելի աղբյուրը

ՀՀ Արդարադատության նախարար Դավիթ Հարությունյանը հերքում է մամուլի այն տեղեկությունները, որ ՀՀԿ ԳՄ վերջին նիստում իր և ՀՀԿ անդամների միջև խոսակցություն է ծավալվել, և որ ԱԺ-ում իր ելույթի համար կուսակիցներն իրենից հաշվետվություն են պահանջել: Այս մասին նա ասաց ԱԺ-ում լրագրողների հետ զրույցի ժամանակ։

Խոսքը, հիշեցնենք, «Դատական օրենսգրքում փոփոխություններ կատարելու մասին» օրենքի սահմանադրական լինել-չլինելու իրարամերժ տեսակետների մասին է, որոնք հայտնել էին ինքը՝ Դավիթ Հարությունյանը և ԱԺ պետաիրավական հարցերի մշտական հանձնաժողովի նախագահ Հրայր Թովմասյանը։

«Իմ ելույթը հրապարակային է եղել, այն կարող են բոլորը դիտել: Ինձանից որևէ մեկը չէր կարող հաշվետվություն ուզել, որովհետև ակնհայտ էր, թե իմ խոսքն ինչին է վերաբերում: Ես խոսում էի այն մասին, որ դահլիճում ընդդիմադիր մեր գործընկերների հնչեցրած քննադատությունը վերաբերում էր այլ օրենքի, ոչ թե նրան, որը քննարկվում էր այդ պահին»,-  նշեց նախարարը։

Անդրադառնալով ապագա նախագահի թեկնածուի թեմային՝  Դավիթ Հարությունյանը հրաժարվեց անուններ տալ։

«Լինելով քաղաքական թիմի անդամ՝ ձեռնպահ կմնամ հրապարակային ներկայացնել այն թեկնածուներին, որոնց ունեմ իմ մտքում: Քննարկումից հետո ձեզ կտեղեկացնեմ, եթե իմ թեկնածուներն ընդունելի լինեն»,- շեշտեց գործադիրի ներկայացուցիչը՝ միաժամանակ հավելելով, որ իր համոզմամբ, երկրում նախագահի թեկնածուները շատ չեն։

Ինչ վերաբերում է իր հետագա պաշտոնավարմանը` Արդարադատության նախարարը նշեց, որ որևէ երաշխիք որևէ մեկը չունի: