Ձեր վստահելի աղբյուրը

«Առողջապահության նախարարության անձնակազմը և թիմը շատ հստակ ձևակերպում է ուր ենք գնում, ինչի ենք հասնելու և՛ կարճաժամկետ, և՛ երկարաժամկետ հեռանկարում»,-այս մասին հայտարարել է վարչապետ Կարեն Կարապետյանը առողջապահության նախարարի հետ հանդիպման ժամանակ:

Նա խնդրել է՝ անպայման տեղյակ պահել հանրությանը՝ ինչ են անում և ինչն են փոխում, ինչ տրամաբանությամբ:

«Բացի այն նորմերից, որ  քաղաքացուն պետք են, այլ նաև, թե որ ուղղությամբ է նախարարությունը գնում»,-ասելէ  լառավարության ղեկավարը:

Կառավարության հասարակայնության հետ կապերի վարչության փոխանցմամբ, առողջապահության նախարար Լևոն Ալթունյանը զեկուցել է, որ նախորդ տարվա ընթացքում համակարգում իրականացվել են բեկումնային փոփոխություններ և ակնկալվում է, որ դրանց արդյունքները հասարակությունը կզգա 2018 թվականի ընթացքում:

Նախարարն առանձնակի կարևորել է պետական պատվերի կազմակերպման և ֆինանսավորման մեխանիզմների բարեփոխման ծրագրի շրջանակում սոցիալական փաթեթի շուրջ 100 հազար շահառուի պետության կողմից ձեռք բերված ապահովագրական փաթեթների միջոցով բժշկական օգնության կազմակերպումը։ Նրա խոսքով, նախադրյալներ են ստեղծվել ընթացիկ տարվա գարնանից սոցիալապես անապահով և հատուկ խմբերում ընդգրկված 612 հազար քաղաքացիների  բժշկական ծառայությունները նույն կարգով կազմակերպելու համար:

Նախարարության աշխատակազմի ղեկավար Նելսոն Զուլոյանը զեկուցել է, որ 2017-ի ընթացքում գերատեսչության 16 գերակա խնդիրներից իրականացվել է 13-ը, իսկ մյուս երեքն ավարտին կհասցվեն մինչ փետրվարի վերջ:

2018-ին նախարարության համար կարևորագույն ուղղություններից է լինելու ՀՀ-ում մահացության կառուցվածքում առավել բարձր տեղերը զբաղեցնող չարորակ նորագոյացությունների, սիրտ անոթային հիվանդությունների  դեմ պայքարի ազգային ռազմավարությունների ներդրումը: Նախատեսվում է առողջության առաջնային պահպանման օղակի բարեփոխումների հայեցակարգի ներդրում. ներկայումս  ընտանեկան բժշկի այցելությունը քաղաքացուն տարեկան  կազմում է 4-5 անգամ,  նախատեսվում է  այդ ցուցանիշը հասցնել մինչև  10-12-ի: 

Նշվել է, որ ընտանեկան բժշկի համակարգում ներդրվելու է բոնուսային համակարգ, ինչի արդյունքում նրանց ամսական աշխատավարձը կբարձրանա մինչև 2,5 անգամ, իսկ այցելությունների ավելացումը կնպաստի հասարակության շրջանում հիվանդությունների կանխարգելմանն ու ավելի վաղ հայտնաբերմանը: