«Ելք»-ի գործողություններում ես առայժմ քաղաքական օրակարգ չեմ տեսել. Զարուհի Փոստանջյան

Քաղաքական 13:55 17/01/2018 Հայաստան

Այս տարին կարևոր տարի է: Մենք ունենք հարյուրամյա Հանրապետության պատմություն, ու թեև այդ հանրապետությունը երկար կյանք չունեցավ, այդուհանդերձ այսօր ունենք Հանրապետություն ունենալու 100 տարվա փորձ: Այսօր տեղի ունեցած մամուլի ասուլիսի ժամանակ այս մասին ասաց «Երկիր Ծիրանի» կուսակցության ղեկավար Զարուհի Փոստանջյանը:

«Այս տարին կարևորում եմ նաև ազատագրման պայքարի երեսունամյա փորձ ունենալու տեսանկյունից: Արցախյան շարժումը նոր պատմություն է, որը հաթանակի, ոգեշնչման միտված իրողություն է: Մենք հիմա էլ պետք է պայքար մղենք, իսկ պայքարը դաժան և դժվար է: Դրա տրամաբանությունը բռնակալությունը տապալելն ու Հանրապետություն ստեղծելն է»,- ասաց նա:

Անդրադառնալով թանկացումների թեմային՝ Զարուհի Փոստանջյանը շեշտեց՝ դրանք հետևանք են քաղաքական համակարգի: Նրա համոզմամբ, եթե չփոխենք քաղաքական համակարգը և չունենանք ժողովրդավարական երկիր, թանկացումները կանխել հնարավոր չի լինի:

Ինչ վերաբերում է թանկացումների դեմ «Ելք» դաշինքի առաջիկա երթին՝ բանախոսը նկատեց՝ դրա տեքստը քաղաքական չէ, այլ զուտ հայտարարություն է:

«Պայթյունը դառնում է անխուսափելի: Եթե կլինի քաղաքական օրակարգ, կլինեն նաև քաղաքական լուծումներ: «Ելք»-ի գործողություններում ես առայժմ քաղաքական օրակարգ չեմ տեսել: Պետք է համակարգային փոփոխություններ իրականացնել: Ընդդիմությունը և Սերժ Սարգսյանը խոսում են նույն խնդրի շուրջ, մինչդեռ նրանք չէին կարող խոսել նույն խնդրի մասին»,-ընդգծեց «Երկիր Ծիրանի» կուսակցության առաջնորդը:

Զարուհի Փոստանջյանը հայտարարեց, որ իր ղեկավարած քաղաքական ուժն անտարբեր է առաջիկա նախագահական ընտրությունների հանդեպ, և թե ով կլինի ՀՀ նոր նախագահը, իրենց համար այնքան էլ էական չէ:

Հարցին՝ անտարբեր են նաև ՀՀ հաջորդ վարապետի՞ հարցում, քաղաքական գործիչը պատասխանեց. «Անտարբեր ենք այնքանով, որ այս համակարգը պահպանվելու է: Մենք պայքարում ենք, որպեսզի տապալենք այս քաղաքական համակարգը»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: